Ғаилә бизнесы буйынса һуңғы семинар тамамланды

 «Һөҙөмтәле һәм конкурентлы иҡтисад»(национальный проект «Эффективная и конкурентная экономика») милли проекты сиктәрендә ойошторолған «Ғаилә эшҡыуарлығы» семинары Өфөлә 20-нән ашыу ҡыҙыҡһынған ҡатнашыусыны - уңышлы ғаилә бизнесын үҫтерергә ынтылған компаниялар хужаларын һәм буласаҡ нигеҙ һалыусыларҙы йыйҙы. Был хаҡта республиканың Эшҡыуарлыҡ һәм туризм министрлығы хәбәр итә.

- Ғаилә бизнесы - ул ышанысты, дөйөм ҡиммәттәрҙе һәм яуаплылыҡты берләштергән үҙенсәлекле эшҡыуарлыҡ төрө. Бындай предприятиелар йыш ҡына төбәк иҡтисадының ышаныслы нигеҙе булып тора. Шуға күрә ғаилә бизнесына һәр яҡлап ярҙам күрһәтеү беҙҙең төп бурыс булып тора, - ти Башҡортостан Республикаһының Эшҡыуарлыҡ һәм туризм министры Светлана Верещагина.

Ғаилә эшен алып барғанда килеп тыуған төп мәсьәләләрҙе: ғаилә һәм бизнес эсендәге бәхәстәр менән һөҙөмтәле идара итеүҙе, баҙарҙа ғаилә брендын урынлаштырыуҙы һәм квалификациялы кадрҙар йәлеп итеү өсөн йәлеп итерлек бренд булдырыуҙы тикшереү семинарҙың төп маҡсаты булды.

- Бындай семинарҙарҙың үҙенсәлеге уларҙың практик йүнәлешендә булыуында. Бөтә кейстарҙы һәм инструменттарҙы ҡатнашыусылар иртәгә үк үҙ бизнесында - ағымдағы мәсьәләләрҙе хәл итеү һәм потенциаль конфликттарға юл ҡуймау өсөн ҡуллана ала, - тип билдәләне Башҡортостан Республикаһы Бәләкәй һәм урта эшҡыуарлыҡты үҫтереү буйынса агентлығы директоры Екатерина Смоленчук.

Семинар әүҙем үҙ-ара килешеп эш итеү һәм асыҡ диалог форматында үтте. Кәңәшмәлә ҡатнашыусылар тапшырылған материалдарҙың юғары сифатын һәм ҡаралған миҫалдарҙың практик йүнәлешен билдәләне, алған белемде кисекмәҫтән көндәлек эшкә индерергә теләүен белдерҙе.

Яңыртылған милли проекттар Рәсәй Президенты Владимир Путиндың ҡарары буйынса 2025 йылдан тормошҡа ашырыла.