Берләштереүсе осрашыу

Иҫәп буйынса 22-се фестивалдә Башҡортостан Республикаһы, Татарстан һәм Ырымбур өлкәһе райондары һәм ҡалаларынан егерменән артыҡ иң яҡшы халыҡ һәм эстрада коллективтары ҡатнашты.

Конкурс ике этапта уҙҙы. Һәүәҫкәр артистарҙың сығыштарын БР-ҙың республика халыҡ ижады үҙәге вәкилдәре ингән абруйлы жюри баһаланы. Һайлап алыу турында коллективтар жюри хөкөмөнә иң шәп номерҙарын тәҡдим итте. Ә гала-концертта тамашасылар мәҙәниәттәрҙең күп төрлөлөгөн һәм үҙенсәлектәрен күрҙе, ҡатнашыусыларҙың башҡарыу оҫталығына таң ҡалып, рәхәтлек сикте.

Был ҙур фестиваль еңеүселәрҙе бүләкләү менән тамамланды, улар араһында бәләбәйҙәр ҙә бар. “Русские звоны” рус йыры халыҡ хоры гран-при яуланы. “Халыҡ вокалы” номинацияһында Өҫән-Ивановка ауыл мәҙәниәт йортоноң “Сударушки” ансамбле өсөнсө урынға лайыҡ булды. “Илем” сыуаш халыҡ фольклор ансамбле “Традицион фольклор коллективы” номинацияһында беренсе урын яуланы.

Көйҙәр уйналды, йырҙар йырланды, бүләктәр үҙ еңеүселәрен тапты.

Әнисә Ғәҙелшина