Бәләбәйҙә тағы бер резидент

«Ул – «Бәләбәй» йылдам социаль-иҡтисади үҫеш биләмәһендә пиломатериалдар һәм арболит панелдәр етештерергә ниәтләгән «Юпитер» һөҙөмтәле стандарт булмаған технологиялар ғилми-етештереү үҙәге», – тип хәбәр иттеләр Башҡортостан Иҡтисади үҫеш һәм инвестиция сәйәсәте министрлығының матбуғат хеҙмәтенән.

Инвестиция проектының дөйөм хаҡы яҡынса 322 миллион һум тәшкил итә.

Проект уңышлы тормошҡа ашырылған осраҡта производствола 140-тан ашыу яңы эш урыны булдырыла.

6 ноябргә ҡарата мәғлүмәттәр буйынса, Рәсәйҙең Иҡтисади үҫеш министрлығы төҙөгән Йылдам социаль-иҡтисади үҫеш биләмәләре резиденттары реестрына республиканан 30 инвестор ингән. Шуларҙың 13-ө Күмертауҙа, тағы шунсаһы – Бәләбәйҙә, икәүһе – Нефтекамала, Белоретта ла, Благовещенда ла – берәр.

Зөлфиә Ғарифуллина әҙерләне