Башҡортостанда сәсеү эштәре башланды

Тәүгеләрҙән булып сәсеүгә Урал алды дала һәм көньяҡ урман-дала климат зоналарында төштөләр. Хәҙер Дүртөйлө һәм Илеш райондарында сәсеү кампанияһы әүҙем бара – әлеге ваҡытта бында 2,1 һәм 1,8 мең гектарҙа сәселгән.

Дөйөм алғанда, 14 апрелгә Башҡортостанда 5,7 мең гектар майҙанда яҙғы сәсеү эштәре башҡарылған. Быйыл иген һәм ҡуҙаҡлы культуралар өсөн бөтәһе 2 миллиондан ашыу гектар бүлеп биреү планлаштырыла.

Бәләбәйҙең ауыл хужалығы эшсәндәре әлеге ваҡытта әҙерлек һыҙығында. Хужалыҡтар яғыулыҡ-майлау материалдары, орлоҡтар менән тәьмин ителгән. Һауа шарттарының нисек тороуына ҡарап, улар апрелдең өсөнсө ун көнлөгөндә сәсеү эштәрен башларға ниәтләй.

Зөлфиә Ғарифуллина әҙерләне