Аксаков ауыл биләмәһендә Еңеү көнөнә әҙерлек эштәре бара

Һуғышта һәләк булған аксаковтар иҫтәлегенә бағышланған мемориалды яңырттылар: уға косметик ремонт яһанылар, ҡоймаһын буянылар, тирә-яғында үҫкән ҡоро ағастарҙы киҫтеләр, сәскәләр ултырттылар. Мемориалды төҙөкләндереүҙә биләмә хакимиәте, Аксаков һәм Надеждин китапханалары, БЭС, «Мираҫ» парктар хужалығы хеҙмәткәрҙәре актив ҡатнашты.

Аксаковта йәшәүсе Максим Мехведь менән Татьяна Ушакова сәскә үҫентеләре һатып алырға аҡса бирҙе. Максим шулай уҡ үҙ теләге менән Туғандар ҡәберлеген тәртипкә килтереүҙә ярҙам итте. Ҡәберлеккә илтеүсе юл таҙартылды, ҡомташ һибелде.

Ҡыҙғанысҡа ҡаршы, бөгөнгә Аксаков биләмәһендә һуғышта ҡатнашыусыларҙан бер кем дә иҫән түгел. Байрам алдынан тыл ветерандары мотлаҡ ҡотлауҙар ҡабул итәсәк. 9 Май көнөндә һуғышта һәләк булғандарға ихтирам йөҙөнән мемориалға һәм Туғандар ҡәберлегенә веноктар, сәскәләр һалынасаҡ.

Зөлфиә Ғарифуллина