Балаларға ялды тағы бер аҙ көтөргә тура килә

«Әйҙәгеҙ, үҙебеҙгә гөнаһ алмайыҡ. Роспотребнадзор ярамай тип әйтә икән, тимәк, ярамай, сөнки сир таралһа, бының енәйәт эҙәрлекләүе булыуы мөмкин, – тине Радий Хәбиров. – Яҡынса 13-15 июлгә билдәләйбеҙ. Күҙәтеп барырбыҙ».

Республика етәксеһе һүҙҙәренсә, төбәк шифаханалары ла әлегә ябыҡ килеш ҡала һәм обсерваторҙар режимында эшләүен дауам итә.

Башҡортостандың һаулыҡ һаҡлау министры Максим Забелин хөкүмәттәге оператив кәңәшмәлә хәбәр итеүенсә, 29 июнгә республикала COVID-19 йоҡтороуҙың 5 315 осрағы теркәлгән. Һуңғы тәүлектә ул 48-гә артҡан. Ведомство башлығы һүҙҙәренсә, артым темпы 1% аҙыраҡ.

«693 пациент – стационарҙа, уларҙың 32-һе – ауыр хәлдә, – тип өҫтәне Максим Забелин. – 1734 кеше амбулатор шарттарҙа дауалана. Тәүлек эсендә 17 пациент һауығып сыҡҡан. Яңы коронавирус инфекцияһын еңгәндәрҙең дөйөм һаны – 2870».