Тыуған еребеҙҙең гүзәллеген күрәйек

Бының өсөн йылдан-йыл уңайлы шарттар тыуҙырыла. Күптән түгел Торатау итәгендә ете тирмәнән һәм кафенан торған ҡунаҡхана эшләй башланы, тип хәбәр итә киң мәғлүмәт саралары.

Проекттың авторы – Ишембай районынан Тимур Искәндәров. Ул бынан биш йыл элек тәбиғәт ҡосағында, асыҡ һауала туристар өсөн лагерь булдырыу уйы менән яна башлай, уларҙы Башҡортостандың хозур тәбиғәте генә түгел, бай тарихы менән дә таныштырғыһы килә. Тимурҙың хыялын тормошҡа ашырыуҙа Ишембай районы хакимиәте, «Торатау» геопаркы, урындағы эшҡыуарҙар ярҙам иткән.

Эко-отель туристарҙы йыл әйләнәһенә ҡабул итәсәк, көҙгә ҡарай тирмәләр йылытыласаҡ. Ҡунып сығыуҙан, башҡорт аш-һыуынан ауыҙ итеүҙән тыш, теләгән һәр кем өсөн Торатау үренә экскурсия, һыбай йөрөү, фотосессия тәҡдим ителәсәк.

Фото «Башинформ»дан