Совет майҙанында данлыҡлы 112-се Башҡорт атлы дивизияһы командиры, генерал майор Миңлеғәле Шайморатов иҫтәлегенә һәйкәл ҡуйыла. Монументҡа авторҙар араһында конкурс иғлан ителгән. Буласаҡ һәйкәлдең үлсәмен күҙ алдына килтереү маҡсатында төҙөүселәр уның макетын әҙерләгән.
Башҡортостан башлығы майҙандағы эш барышын ентекләп ҡарап сыҡты, буласаҡ һәйкәлдең үлсәмен дә хупланы. Совет майҙанын яңыртыу барышында Совет һәм Пушкин урамдарын төҙөкләндереү ҡарала. Яҡтыртыу ҡоролмалары, видеокүҙәтеү системаһы беркетелә, тротуар киңәйтелә. Скверға саған һәм туя ултыртыу проектланған. Төҙөүселәр Башҡортостанда етештерелгән матераилдарға өҫтөнлөк бирә.
Совет майҙанын яңыртыу йыл аҙағына тулыһынса тамамланырға тейеш.