Хаҡлы ялдағылар, өйҙә генә ултырмайыҡ әле!

Республика етәксеһе Радий Хәбиров социаль селтәрҙәрҙә сәйәхәт итергә теләгән оло быуын вәкилдәре өсөн ошо хаҡта яңы яҙмаһы менән уртаҡлашты.

«Йыш ҡына шулай була: кеше ғүмере буйына тыуып үҫкән районында йәшәй, эшләй. Командировкаларға һәм ял итергә башҡа төбәктәргә бара, ә Башҡортостан буйлап сәйәхәт итмәй. Быны бөтөнләй ғәҙелһеҙлек тип һанайым. Беҙҙә ҡыҙыҡлы урындар бик күп. Шуға күрә «Башҡортостанда оҙон ғүмерлелек» программаһын дауам итәбеҙ һәм үҫтерәбеҙ», – тип яҙған ул.

Программаның туристик йүнәлеше буйынса маршруттар һаны арттырылған: хәҙер 14 туроператор республика буйлап 42 тур тәҡдим итә.

«Хаҡлы ялдағыларҙың да әүҙем, ҡыҙыҡлы, бай тормош менән йәшәүе беҙҙең өсөн бик мөһим. Беҙ уларға үҙенсәлекле республикабыҙҙы күрһәтергә теләйбеҙ», – тип билдәләй Башҡортостан Башлығы.

Быйыл программа 10 мең ҡатнашыусыға иҫәпләнгән. Унда 60 йәше тулған ир-егеттәр, 55 йәште үткән, шул иҫәптән ваҡытынан алда пенсияға сыҡҡан  ҡатын-ҡыҙҙар саҡырыла.

Башҡортостан буйлап йылына бер тапҡыр бушлай сәйәхәткә сығырға мөмкин. Программала ҡатнашыусы өсөн трансфер, страховка, маршрут буйынса 8-10 сәғәтлек экскурсиялар, гид-экскурсовод, медицина һәм социаль хеҙмәткәрҙәр, эсәр һыу бушлай.

Программала ҡатнашыу өсөн долголетие.соцтуризмрб.рф сайтында теркәлергә һәм  уңайлы маршрутты,  датаны һайлап, теләһә ниндәй турға яҙылырға, йәки ҡала йәки район хакимиәтенә мөрәжәғәт итергә кәрәк.