Мутлашыусылар пенсионер ҡатынды кәрәҙле оператор исеменән алдаған

Алдау схемаһы классик булған. Беренсе июлдә пенсионер ҡатындың телефонына үҙен кәрәҙле элемтә компанияһы хеҙмәткәре итеп танытҡан ир шылтыратҡан. Килешеүҙе оҙайтыу һәм хеҙмәттәрҙең сифатын яҡшыртыу һылтауы менән оло йәштәге ҡатынды смс-хәбәрҙән һылтанма буйынса күсергә күндерә. Таныш булмаған кешегә ышанып, ул үҙенең банк картаһы мәғлүмәттәрен әйтеп биргән, һуңынан үҙенең смартфонына инеү өсөн программа урынлаштырған.

Енәйәтсе телефонда контроль алғас та, ҡатындың һаҡлыҡҡа йыйған аҡсаһын үҙенең иҫәбенә күсерә, артабан эҙен таҙарта: хат алышҡан һылтанманы юя.

Урлашыу факты буйынса енәйәт эше ҡуҙғатылған. Хәҙер полицейскийҙар енәйәтселәрҙең шәхестәрен асыҡлай.

Башҡортостан Республикаһы буйынса Эске эштәр министрлығы банк, полиция һәм кәрәҙле операторҙарҙың ысын хеҙмәткәрҙәре бер ҡасан да телефон аша конфиденциаль мәғлүмәт һорамай, тип иҫкәртә. Таныш булмаған кешеләрҙең һылтанмалары буйынса күсмәгеҙ һәм телефонға ситтән тороп инеү программаһын ҡуймағыҙ – ул аҡса урлауҙың тура юлы.