Бәләбәй районынан пенсионер 600 мең һумынан ҡолаҡ ҡаҡҡан

Башҡортостан республикаһы буйынса Эске эштәр министрлығынан хәбәр итеүҙәренсә, билдәһеҙ ҡатын пенсионерҙың стационар телефонына шылтыратып, үҙен поликлиника шәфҡәт туташы тип таныштыра һәм диспансеризацияға яҙылыу өсөн СНИЛС мәғлүмәттәрен биреүҙе һорай. Оло йәштәге ҡатын, алдашыуҙы һиҙмәйенсә, кәрәкле мәғлүмәт бирә.

Тиҙҙән икенсе енәйәтсе пенсионер менән бәйләнешкә инә һәм уның «Дәүләт хеҙмәттәре» порталындағы аккаунтына инеүҙәре тураһында хәбәр итә. ФСБ-ның ялған хеҙмәткәре, шулай уҡ һөйләшеүгә инеп, ҡатынды финанс операциялары аша дуҫ булмаған дәүләттәргә аҡсалата ярҙам итеүҙә  ғәйепләй. Был һылтау менән мутлашыусылар пенсионерҙы иҫәптән 600 мең һум аҡсаһын алырға һәм уларҙы хәүефһеҙ иҫәпкә күсереү өсөн курьерға тапшырырға күндерә.

Ҡатын, алдаҡ ҡорбаны булыуын аңлағандан һуң, полицияға мөрәжәғәт итә. Был факт буйынса мутлашыу статьяһы буйынса енәйәт эше ҡуҙғатылған. Хоҡуҡ һаҡлау органдары енәйәтселәрҙең шәхесен асыҡлау һәм юғалтылған аҡсаны кире ҡайтарыу өсөн тикшереү үткәрә.