Үҫмерҙәргә ауыр эш бирелмәйәсәк

Бәләбәй районында был айырыуса мөһим: йыш ҡына үҫмерҙәр каникул ваҡытында сауҙала, келәттәрҙә, хеҙмәтләндереү өлкәһендә эш эҙләй. Хәҙер ҡағиҙәләр ҡатыраҡ һәм аныҡ буласаҡ.

Дәүләт Хеҙмәт инспекцияһы етәксеһе урынбаҫары Оксана Ванскова аңлатыуынса, сикләүҙәр бер юлы ике сәбәп буйынса индерелә: үҫмерҙәрҙең һаулығын һаҡлау һәм уларҙың әхлаҡи үҫешен яҡлау өсөн.

«Һүҙ балаларҙы аҡса эшләү мөмкинлегенән мәхрүм итеү тураһында түгел, ә уларҙы ысынлап та хәүефле һәм зарарлы хеҙмәт шарттарынан һаҡлау тураһында бара, – тип билдәләне Оксана Ванскова. - Физик яҡтан ауыр эштәр, хәүефле производстволар, шулай уҡ шәхес формалашыуына кире йоғонто яһай алған эшмәкәрлек тыйыла».

Мәҫәлән, балиғ булмағандарға төнгө клубтарҙа эшләргә, алкоголь һәм тәмәке изделиелары етештереүҙә һәм һатыуҙа ҡатнашырға ярамай.

Документтың төп яңылығы – формулировкаларға ҡарашта. Хәҙер тыйыуҙар конкрет һөнәрҙәргә бәйле, һәм ғәмәлдә эш биреүселәр ҡайһы берҙә сикләүҙәрҙе урап үтеп, вазифаның исемен үҙгәртә ине: мәҫәлән, «грузчик» урынына «погрузка бүлеге белгесе» тип яҙалар. Яңы исемлек был етешһеҙлектәрҙе бөтөрөү өсөн төҙөлгән: тыйыу вазифа исемдәренә генә түгел, ә эш төрҙәренә лә ҡағыла.

Исемлектә категориялар буйынса төркөмләнгән бөтәһе 69 эш төрө бар. Был үҫмерҙе «нейтраль» атама аҫтында ауыр эшкә йәлеп итеү осраҡтарын булдырмаҫҡа мөмкинлек бирә.