Йүкә, ҡарабойҙай, сәскә…

Сираттағы «Бал ҡорто туйы» сауҙа майҙансығында республикабыҙҙың төрлө мөйөштәренән: Бәләбәй, Бишбүләк, Йәрмәкәй һәм Миәкә райондарынан 20 умартасыны йыйҙы. Уларға Татарстан һәм Ырымбур өлкәһе умартасылары ҡушылды.

Район халҡы һәм ҡунаҡтар балдың төрлө төрҙәрен тәмләп ҡараны һәм һатып алды. Ассортимент бай ине: төрлө балдарҙы төрлө сувенир һауыттарҙа ла, кәрәҙ балы ла тәҡдим ителде.

Тәжрибәле умартасылар үҙ һөнәренең серҙәре менән теләп уртаҡлашты һәм балды нисек дөрөҫ һайларға һәм умартасылыҡ продукттарын (һитә, һеркә, прополис) һаулыҡты нығытыу өсөн нисек ҡулланырға кәрәклеге тураһында ла һөйләнеләр.

«Һөҙөмтәләр менән ҡәнәғәтмен. Аралашыу ҙа миңә бик оҡшаны, - тип уртаҡлашты фестивалдә ҡатнашыусы Йәрмәкәй районынан умартасылар династияһы вәкиле Самат Кәлимуллин. – Бөтә кешеләр йылмая, һауа торошо яҡшы. Күп йылдар инде умартасылар менән аралашабыҙ. Фестиваль идеяһы миңә оҡшаны, саҡырһалар, тағы килермен».

Байрамдың һөнәрселек өлөшө лә ҡыҙыҡлы килеп сыҡты. Оҫталар ағас сувенирҙар, бәйләнгән әйберҙәр, һабын, уйынсыҡтар һәм балауыҙҙан һәм эпоксид ыҫмалананан стилле әйберҙәр тәҡдим итте. Айырым мөйөш балалар ижадына бағышланды, ә теләгән һәр кем өсөн оҫталыҡ дәрестәре үткәрҙеләр, унда һәр кем үҙен ниндәйҙер һөнәрҙә һынап ҡарай алды.

Фестивалдең татлы акценты булып баллы ҡамыр ризыҡтары, үлән сәйҙәре торҙо. уның ҡунаҡтарына бушлай тәҡдим итәләр.

Үҙәк мәҙәниәт һәм «Урал батыр» һарайҙарының ижади коллективтары төҙөгән концерт программаһы байрамдың биҙәге булды. Тамашасыларҙы шулай уҡ шатлыҡлы кәйеф тыуҙырған, балалар һәм өлкәндәрҙең иғтибарын йәлеп иткән ҙур ҡурсаҡтар ҙа ҡыуандырҙы.

«Старогородецкий» үҙәге өсөн «Бал ҡорто туйын» үткәреү дебют булды. Фестивалде ойоштороусылар  – Бәләбәй районы хакимиәте – тәжрибәне уңышлы тип иҫәпләй: йәрминкәне йәйелдерергә, сығыштар һәм оҫталыҡ дәрестәре ойошторорға урын етте, хәҙер майҙансыҡты артабан үҫтерергә ниәтләйҙәр.

Байрам ысын ғаилә фестивале булды: бында файҙалы әйберҙәр һатып алырға ла, яңы нәмәләр белергә лә, яҡындарың менән яҡшы ваҡыт үткәрергә лә мөмкин ине. «Бал ҡорто туйы» тағы бер тапҡыр ябай шатлыҡтарҙың – тәмле бал, ҡыуаныслы осрашыуҙар һәм ижадтың – кешеләрҙе берләштерергә һәм сағыу эмоциялар бүләк итергә һәләтле булыуын иҫбатланы.

Елена Петрова фотолары