5 сентябрь – Приют ҡасабаһы көнө. Икеләтә юбилей

Ике быуатлыҡ данлы тарих – ул лайыҡлы юбилей!

Беҙ Приют ҡасаба советы ҡала хакимиәте башлығы Лилиә Юнысова менән юбилей йылында ҡасаба тормошонда нимәләр үҙгәреүе хаҡында һөйләштек.

– Иң мөһиме, ҡала биләмәһендәге бөтә социаль учреждениелар, ойошмалар һәм предприятиелар тотороҡло эшләй. Элекке йылдарҙа эшләнгән һәм төҙөкләндерелгән  бөтә нәмә һаҡлана.

Беҙҙең эште кешеләр тәү сиратта юлдарҙың, ихаталарҙың, социаль учреждениеларҙың, ял итеү урындарының торошо буйынса баһалай... Һуңғы йылдарҙа ҡала инфраструктураһын үҙгәрттек, халыҡтың да ярҙамы менән. Урындағы башланғыстарға ярҙам итеү һәм граждандарҙың һәм меценаттарҙың проекттарын берлектә финанслауҙа әүҙем ҡатнашыу программаһы буйынса беҙ элекке йылдарҙа күпселек мәктәпкәсә, мәктәп ойошмаларында һәм мәҙәниәт учреждениеларында уҡытыу һәм тәрбиәләү шарттарын яҡшырта алдыҡ.

Быйыл ППМИ-ла ҡатнашыуға биш ғариза бирҙек, әммә финанслауҙың ҡыҫҡартылыуына  бәйле бер генә ғариза үтте: 7-се мәктәптең спорт залында 1 миллион 700 мең һумға иҙән алмаштырыу проекты еңде. Проект уңышлы тамамланды – финанслау, берлектә финанслау һәм подряд эштәре билдәләнгән ваҡытта башҡарылды.

«Тормош өсөн инфраструктура» милли проектының «Уңайлы ҡала мөхите булдырыу» программаһы буйынса «Йәштәр» скверын төҙөкләндереүҙең икенсе этабы тамамланыуға яҡынлаша. Был проект – 2025 йылда Бөтә Рәсәй тауыш биреүендә еңеүсе. Беренсе этапта асфальт түшәлде, юлдар эшләнде, эскәмйәләр ҡуйылды һәм күп функциялы спорт майҙансығы төҙөлдө. Икенсе этапта майҙансыҡтарға асфальт түшәлде, тротуар һәм юл бордюрҙары ҡуйылды, резина япма һалынды, ҡорамалдар памп-трек, мини-рампа, өҫтәл теннисы өсөн өҫтәлдәр ҡуйылды, газон ултыртылды. Хәҙер видеокүҙәтеү камералары ҡуйыла, ҡоролмаларҙы буяу тамамлана. Эштәрҙе «Триада-Строй» йәмғиәтенең подряд ойошмаһы башҡара. Контракт хаҡы 6 653 985, 21 һум тәшкил итә.

Файҙаланыуға тапшырыу ваҡыты – 5 сентябрь! Әммә балалар Һәм өлкәндәр Ленин урамындағы ял итеү урынын әүҙем файҙалана ла инде.

«Башҡорт ихаталары» программаһы 2026 йылдан алып үҙгәрҙе: комплекслы төҙөкләндереү юҡ, элек ҡуйылған майҙансыҡтарҙы ремонтлау ғына бар. Ҡасабала ике ихатала балалар майҙансыҡтары элементтары ремонтланасаҡ – резина япмаһын алмаштырыу, бәүелсәктәрҙе нығытыу һ. б.

Барыһын да һаҡлап ҡалыу бик ауыр – вандализм, ҡыҙғанысҡа ҡаршы, күҙәтелә, аңлатыу эштәре алып барыуыбыҙҡңға ҡарамаҫтан, – тип һөйләне Лилиә Рим ҡыҙы.

Юлдар тураһында

Ҡасабала проблемалы юлдар бар, әммә финанс етешмәү сәбәпле ремонт ваҡыты күсерелә. Ике участканы ремонтлауҙы ғына тамамлай алдыҡ.

ВЛКСМ-дың 50 йыллығы урамының асфальт япмаһын ремонтлау буйынса эштәрҙе (Тыныслыҡ бульварынан Калинин урамына тиклем) «Дорремстрой» йәмғиәтенең подряд ойошмаһы башҡара. Был ике йыллыҡ контракт булды, ремонт Башҡортостан Республикаһының дөйөм ҡулланылыштағы автомобиль юлдарын ҡарау, капиталь ремонтлау, төҙөү һәм реконструкциялау буйынса территориаль заказды тормошҡа ашырыу сиктәрендә тормошҡа ашырылды. 555 метр юл япмаһы норматив хәлгә килтерелде, юлдың өлөшөнә асфальт түшәлде, бордюр таштары алмаштырылды.

Оло Баҡса урамындағы юлды өс йыллыҡ контракт нигеҙендә «Дорстрой0909» яуаплылығы сикләнгән йәмғиәтенең подряд ойошмаһы ремонтлай. Эштәр Башҡортостан Республикаһының дөйөм ҡулланылыштағы автомобиль юлдарын ҡарау, капиталь ремонтлау, төҙөү һәм реконструкциялау буйынса территориаль заказды тормошҡа ашырыу сиктәрендә тормошҡа ашырылды – 760 метр юл норматив хәлгә килтерелде. Был участкала ла ремонт тамамланған.

– Нимәләр Приют ҡасабаһы халҡы өсөн ғорурлыҡ уята?

– Муниципалитет етәксеһе булараҡ мин граждандарыбыҙҙың патриотик кәйефе һәм ярҙамсыллығы менән ғорурланам. Был бигерәк тә махсус хәрби операция башланғандан  асыҡ күренә. Приютта тыуған тиҫтәләгән ир-егет мобилизация һәм контракт буйынса хәрби бурысын үтәүгә китте, батырлыҡ һәм ҡаһарманлыҡ күрһәтәләр. Ҡыҙғанысҡа ҡаршы, ҡайтмағандар ҙа бар... Беҙ һәләк булғандарҙың ғаиләләрен иғтибарһыҙ ҡалдырмайбыҙ, иҫтәлекле саралар һәм акциялар үткәрәбеҙ.

Ҡасабаның ирекмәндәре тураһында әйтеп тораһы ла түгел. Бындай көслө ирекмәндәр хәрәкәте, моғайын, беҙҙең башҡа райондың бер генә торағында ла юҡтыр.

Приют ҡасабаһының Ярҙам үҙәге ирекмәндәре (плюс «Фронт өсөн маскселтәрҙәр», «Ирҙәр көсө», «Үҙебеҙҙекеләр өсөн тегәбеҙ» төркөмдәре), ветерандар советының көмөш ирекмәндәре, «Үҙебеҙҙекеләрҙе ташламайбыҙ» төркөмө. Приюттың хәрби хәрәкәттәр һәм йәмәғәт ойошмалары, ВДВ, ВМФ, «Хәрби туғанлыҡ» һ.б. ветерандары ҡасабала йәшәүселәрҙе һәм унда тыуғандарҙы берләштерә, ирекмәндәр менән район-ара һәм төбәк-ара бәйләнештәр булдыра һәм бергәләп яугир-яҡташтарҙың һәм госпиталдәрҙең ихтыяжын үтәйҙәр. Барығыҙға ла үҙебеҙҙекеләрҙең мәнфәғәтен ҡайғыртҡанығыҙ һәм изгелегегеҙ өсөн ихлас күңелдән рәхмәт белдерәм. Ҡасабанан гуманитар йөк көн һайын тиерлек ҙур һәм бәләкәй партиялар менән китә.

Приютта йәшәүселәрҙең ғорурланырлыҡ нәмәләре бар!

– Байрам нисек үтәсәк?

– Юбилейҙы байрам итеүгә әҙерлек уҙған йылда башланды – ойоштороу комитеты булдырылды, китап сығарыу өсөн ҡасаба тарихы буйынса материалдар йыйылды. Приют ҡасабаһының 70 йыллығына брендбук конкурсы үткәрелде, Унда Өфөнән ике студент ҡатнашты. Өфө художество-сәнәғәт колледжы студенты Артем Күсәрбаев еңеү яуланы.

Юбилей символикаһы менән урам баннерына Мәҙәниәт йорто янында ҡарап һоҡланырға мөмкин.

Ҡасабаны тәртипкә килтерәбеҙ: биләмәләрҙе төҙөкләндереү менән шөғөлләнәбеҙ, Тыныслыҡ бульварында сәскәләр ултырттыҡ, предприятиелар һәм ойошмалар йәлеп итеп өмәләргә сығабыҙ... Кешеләр яҡшы фекерҙәр әйтә, Приюттың торошона битараф булмауҙары ҡыуандыра.

Байрам сентябрҙең беренсе шәмбеһендә Дан паркында үтәсәк. Бай тантаналар планлаштырмайбыҙ – уның ваҡыты түгел! Әммә уны иң яҡшы хеҙмәткәрҙәрҙе һәм активистарҙы хөрмәтләп, байрам концерт программаһы менән лайыҡлы үткәрәсәкбеҙ. Беҙҙең халыҡ Нефтселәр көнөн һәм Ҡасаба көнөн байрам итеүҙә һәр ваҡыт әүҙем ҡатнаша, ғаиләләре менән килә. Ойоштороусылар төрлө ижади зоналар, оҫталыҡ дәрестәре, төрлө йәштәгеләр өсөн уйындар һәм ярыштар үткәрергә тырыша. Приют халҡы ҡәнәғәт ҡалыр тип уйлайым.

Ҡасаба халҡын юбилейы, барлыҡ нефтселәрҙе һөнәри байрамдары менән ихлас ҡотлайым!

Беҙ Һәр ваҡыт иң ҡатмарлы мәсьәләләрҙе хәл итә алабыҙ, Приютты биҙәйбеҙ һәм данлайбыҙ!

Ҡәҙерле яҡташтар! Бөтә халыҡ тауыш биргән көндәрҙә һеҙ гражданлыҡ позицияғыҙҙы күрһәтерһегеҙ һәм һайлау участкаларына әүҙем килерһегеҙ, тип ышанам.

Барығыҙға ла ғаилә именлеген һәм тыныс күк йөҙөн теләйем! –  тип яуапланы Л.Р. Юнысова.

«БИ» архивынан фото