Бәләбәй районы – уңышлы үҫеш өлгөһө

Ултырыш барышында Спорт министрлығының уҙған йылдағы эш һөҙөмтәләре ентекле анализланды. Республикала спорт өлкәһен үҫтереү йүнәлешен билдәләгән бер нисә өҫтөнлөклө йүнәлешкә айырыуса иғтибар бүленде: махсус хәрби операция ветерандары менән эшләү, «Хеҙмәткә һәм оборонаға әҙер» комплексын тормошҡа ашырыу, шулай уҡ граждандарҙың спорт менән шөғөлләнеү өсөн шарттар менән ҡәнәғәт булыуы.

XXXIII ауыл спорт уйындары еңеүселәрен һәм призерҙарын хөрмәтләү ултырыштың айырым мәле була. Башҡортостан Республикаһының спорт министры Руслан Хәбибов спортсыларҙы һәм тренерҙарҙы лайыҡлы наградалары менән ҡотланы.

Бәләбәй районының был абруйлы ярыштарҙа икенсе урын яулап, яҡшы һөҙөмтәләр күрһәтеүе ҡыуаныслы. Награданы министр ҡулынан Социаль үҫеш идаралығының физкультура һәм спорт бүлеге начальнигы Рәмил Насиров ҡабул итте.

Спорт ҡаҙаныштарына өҫтәп, Бәләбәй районы спорт инфраструктураһын үҫтереү өсөн ҙур ярҙам алды. Рәсәй Спорт министрлығы ярҙамында районға 12 000 000 һумлыҡ «Аҡыллы» спорт майҙансығы төҙөүгә сертификат тапшырыла. Был заманса объект район халҡы өсөн спорт менән шөғөлләнеү мөмкинлеген арттырыуҙа мөһим аҙым буласаҡ һәм күмәк спортты артабан үҫтереүгә булышлыҡ итәсәк.

Фотолар Социаль үҫеш идаралығы тарафынан бирелгән