Бөйөк Ватан һуғышы ветерандарына байрам түләүҙәре тәғәйенләнгән

Социаль фондтың Башҡортостан буйынса бүлексәһе апрель дауамында пенсия менән бергә йыл һайын 9 Майға Бөйөк Ватан һуғышында ҡатнашыусыларға һәм инвалидтарға түләү күсерә. Президент Указына ярашлы, түләү суммаһы 10 мең һум тәшкил итә.

Йыл һайын түләү Бөйөк Ватан һуғышы ваҡытында хәрәкәттәге армияла хеҙмәт иткән йәки хәрби хәрәкәттәр райондарында яраланыу, контузия, имгәнеү йәки ауырыу һөҙөмтәһендә инвалидлыҡ алған ветерандарға билдәләнә. Бынан тыш, түләүҙе Бөйөк Ватан һуғышы барышында хәрби операцияларҙа ҡатнашҡаны, ғәмәлдәге армияның хәрби частарында һәм дошман тылында йәки сит илдәр территорияһында, шулай уҡ башҡа ҡайһы бер нигеҙҙәр буйынса махсус заданиелар үтәгәне өсөн бирәләр.

Ветерандарға йәки уларҙың яҡындарына ғариза менән бер ҡайҙа ла мөрәжәғәт итергә кәрәкмәй, СФР-ҙың Башҡортостан буйынса бүлексәһе булған мәғлүмәттәргә ярашлы ғаризаһыҙ түләүҙәр тәғәйенләне.