Башҡортостан Башлығы Стәрлетамаҡта «Сауҙагәр 2.0» ҡунаҡсыллыҡ фестивалендә булды

Быйылғы фестиваль ҡаланың 260 йыллығына арнала, тип хәбәр итә Башҡортостан Башлығының матбуғат хеҙмәте.

Хәтерегеҙгә төшөрәбеҙ, фестивалде үткәреү идеяһы Стәрлетамаҡ сауҙагәрҙәре тураһында бай тарих арҡаһында барлыҡҡа килде – XIX быуатта был эре сауҙа үҙәге булды, ә уның сауҙагәрҙәре эшҡыуарлыҡ һәм меценатлыҡ менән дан тотҡан. Сараның төп үҙенсәлеге – XIX быуатта өйәҙ ҡалаһы мөхитенә тулыһынса сумыу. Был профессиональ декораторҙар менән биҙәлгән стилләштерелгән сауҙа рәттәре, арбалар, боронғо һауыт-һаба һәм алтаҡталар. Ҡунаҡтарҙы сауҙагәрҙәр, хәбәрселәр, ҡумтасылар һәм ҡала кешеләре образдарында актерҙар ҡаршы ала. Шуны билдәләп үтәйек, «Сауҙагәр 2.0» ваҡиғалар туризмы өлкәһендәге абруйлы милли премиялар һәм конкурстар еңеүсеһе булды.

2026 йылда сара өс көн дауамында – 4-нән 6 сентябргә тиклем үтә. Уның сиктәрендә бер нисә майҙансыҡ, шул иҫәптән һөнәрселек йәрминкәһе һәм гастрономия зонаһы эшләй.

Төбәк етәксеһе Башҡортостандың Халыҡтар дуҫлығы йортоноң милли мәҙәни үҙәктәре күргәҙмәһен, «Задворки» йәштәр майҙанын, шулай уҡ трактир урамын ҡараны, унда республиканың төп аҙыҡ-түлек сәнәғәте компаниялары стендтары менән танышты.

Башҡортостан Башлығы шулай уҡ бал күргәҙмәһендә һәм һөнәрселек йәрминкәһендә лә булды, унда Рәсәй, Үзбәкстан, Белоруссия һәм Ҡаҙағстан ҡалаларынан 310-дан ашыу оҫта үҙ продукцияһын тәҡдим итте.

«Юбилейная верста» тематик майҙансығында Стәрлетамаҡтың ҙур предприятиелары үҙҙәренең ҡаҙаныштары һәм ҡаланың социаль-иҡтисади үҫешенә индергән өлөшө менән таныштырҙы.

Радий Хәбиров йәйге каникулда Стәрлетамаҡ предприятиеларында эшләгән студент отрядтары вәкилдәре менән дә аралашты. Йәштәр төбәк етәксеһенә хәрәкәткә булышлыҡ иткәне өсөн рәхмәт белдерҙе.

Фестивалде асыу тантанаһында Башҡортостан Башлығы ҡаланың йылдам үҫешен билдәләне һәм ҡаланың юбилейына «Стәрлетамаҡ ғорурлығы» маҡтаулы наградаларын тапшырҙы.

– Стәрлетамаҡҡа – 260 йыл. Был республиканың иң ҡеүәтле сәнәғәт үҙәге. Беҙ уға бергәләп сәскә атыуын теләйбеҙ, – тине Радий Хәбиров. – Һәр ҡалала иң мөһиме – кешеләр. Ҡәҙерле Стәрлетамаҡ халҡы, хеҙмәтегеҙ һәм сыҙамлығығыҙ өсөн минән тәрән ихтирам һәм рәхмәт һүҙҙәрен ҡабул итегеҙ. Бөтә ил һәм республика менән бергә һеҙ бик ҡатмарлы осор кисерәһегеҙ, һуңынан был осор тураһында китаптар һәм легендалар яҙырһығыҙ. Әммә мин был юлды лайыҡлы итеп, бер-беребеҙгә хөрмәт һәм ышаныс менән үтеүебеҙҙе теүәл беләм. Бергәләп илебеҙ мәнфәғәтендә эшләйәсәкбеҙ, егеттәребеҙгә махсус хәрби операцияла ярҙам итәсәкбеҙ. Тыуған көнөң менән, Стәрлетамаҡ! Тыныслыҡ, изгелек һәм сәскә атыу!

Башҡортостан Башлығы шулай уҡ республикала креатив индустриялар өлкәһен үҫтереү өсөн «Сауҙагәр 2.0» фестиваленең әһәмиәтен юғары баһаланы.

– «Сауҙагәр 2.0» – Стәрлетамаҡ һәм Башҡортостандың визит карточкаһы. Был ысын ҙур республика фестивале, бында сит илдәрҙән дә киләләр. Бик яҡшы тарих – ҡала ижади, талантлы кешеләрҙең энтузиазмын һәм уларҙың башланғыстарын хупланы, – тип йомғаҡ яһаны Радий Хәбиров.

Фото: Башҡортостан Башлығының матбуғат хеҙмәте.