Был ҡарарҙы үҙе ҡабул иткән

Был хаҡта редакцияға Приют ҡасабаһы Ярҙам үҙәге ирекмәндәре хәбәр итте һәм яугир менән элемтәгә инергә ярҙамлашты, ә ул газета һорауҙарына яуап бирҙе.

Беҙҙең геройыбыҙ Бишбүләк районының Сиҙәкбаш ауылында 2005 йылда тыуған. Малай алты айлыҡ булғанда, ғаилә Бәләбәйгә күсенә, бала сағы һәм йәшлеге бында үтә.

Кирилл, 15-се мәктәптең туғыҙынсы класын тамамлап, Бишбүләктең Механикалаштырыу һәм электрлаштырыу колледжына уҡырға инә, «Ауыл хужалығы техникаһын ремонтлау электромонтеры» белгеслеге буйынса диплом ала.

Колледжды тамамлау менән, 2024 йылда, егетте армияға алалар. Хеҙмәтен Ҡырымда үтә. 2025 йылда Кирилл Васильев Оборона министрлығы менән контракт төҙөгән һәм Ҡырым сиктәрен һаҡлауын дауам иткән.

Ҡарарҙы ул үҙе ҡабул иткән, улдары тормошонда бындай боролошҡа әҙер булмаған ата-әсәләре ғәжәпкә ҡала, әммә хуплайҙар.

Позывнойҙы яугир үҙе уйлап тапҡан – «Сыуаш», үҙ нәҫелен белдереү өсөн. Ағаһы Иван Владимирович, МХО-ла ҡатнашыусы, ҡарар ҡабул итеү өсөн үрнәк ул.

Өйҙә Сыуашты ата-әсәһе, ағаһы һәм ике апаһы көтә.

Беҙҙең йәш герой – зенит расчеты командиры – Ватанға намыҫлы һәм фиҙаҡәр хеҙмәт итә, бының өсөн: хәрби наградалар – I һәм II дәрәжә «Фиҙаҡәрлек өсөн» миҙалдары, шулай уҡ «Ҡырым Республикаһын яҡлаған өсөн» миҙалы менән билдәләнгән.

Яугир Сыуаш һуғыш хәрәкәттәрендә ҡатнашыусыларға гуманитар ярҙам күрһәтеүсе кешеләргә рәхмәт белдерҙе:

– Беҙгә ярҙам иткән барлыҡ яҡташтарыма оло рәхмәт әйткем килә! Беҙ һынатмайбыҙ – беҙ еңәсәкбеҙ!

Тап бына еңеүгә ышаныс һәм тыл ярҙамы, уның фекеренсә, хәрби тормош ауырлыҡтарына түҙергә ярҙам итә.

Яҡташыбыҙ егеттәрҙең барыһының да хәрби бурыстарын үтәүҙән баш тартмауҙары, яуаплы хеҙмәт итеүҙәрен теләй.

Кирилл Васильевтың иң ҙур хыялы – өйөнә ҡайтыу, белгеслеге буйынса эш табыу, юғары уҡыу йортонда уҡыуын дауам итеү, ғаилә ҡороу...

Тиҙерәк еңеү менән ҡайтығыҙ, яугир Сыуаш! Бәләбәйҙәр һинең менән ғорурлана!

Фото К. Васильевтың шәхси архивынан