Бәләбәйҙә мәктәпкәсә йәштәге балалар гәзиттең нисек баҫылыуы хаҡында белде

Редакция һәм типография экскурсанттары - 39-сы «Йәйғор» балалар баҡсаһының 18 кешенән торған әҙерлек төркөмө тәрбиәләнеүселәре. Сабыйҙарҙы тәрбиәсе Тәнзилә Шакирова һәм тәрбиәсе ярҙамсыһы Светлана Добровольская оҙатып йөрөнө.

Балалар баҡсаһы редакциянан алыҫ урынлашҡанға күрә улар заказлы автобуста килде.

Балалар шау-шыу менән баш мөхәррир Светлана Вилдан ҡыҙы Шириняның кабинетына инде, һаулыҡ һорашты, һура торған кәнфиттәр менән һыйланды, һуңынан гәзиттең нисек барлыҡҡа килеүен иғтибар менән тыңланы.

«Кемдең өйөндә гәзит яҙҙыралар?» – тигән һорауға бер нисә генә сабый, өләсәй-олатайҙарҙа, тип яуап бирҙе...

Мәктәпкәсә йәштәге балалар гәзит баҫылыуҙың ысын тылсымын типографияның баҫыу цехында күрҙеләр: бихисап ҡағыҙ төргәктәре, пленкалар һәм пластиналар, баҫыу машиналары...

Экскурсия оҡшанымы һорауына дәррәү «эйе» тип яуап бирҙеләр.

Балаларҙан кем журналист булырға теләүҙәрен һорағас, бер нисә кеше ҡулын күтәрҙе, улар араһында был юлдар авторының ейәнсәре Агнияныҡы ла бар ине.

«Буласаҡ журналистар» 2027 йылда мәктәпкә бара. Гәзиттең ниндәй формала һаҡланыуын һәм уны баҫтырыу процесын ваҡыт хәл итәсәк...

Тәрбиәсе Тәнзилә Рафаэль ҡыҙы әйтеүенсә, бөгөнгө экскурсия балалар өсөн генә түгел, өлкәндәр өсөн дә асыш булды.

Елена Петрова фотолары