Июль: көсөргәнешлек градусы арта

Һауа торошо мөмкинлек биргәндә мал аҙығы әҙерләү аграрийҙарҙың өҫтөнлөклө эш йүнәлештәренең береһе булып ҡала. Кампанияның уңышы күп факторҙарға, тәү сиратта, һауа торошона бәйле. Ауыл эшсәндәре ҡыш мал аҙығы етешмәүҙе булдырмаҫ өсөн мөмкин булғандың барыһын да эшләй.

Оҙайлы ямғырҙар бер ни тиклем ваҡытҡа мал аҙығы әҙерләү процесын туҡтата. 22 июлгә ҡарата мәғлүмәттәр буйынса, хужалыҡтарҙа 15 000 тонна сенаж һәм 1 116 тонна бесән әҙерләнгән. Бер нисә хужалыҡта: «Эконива» йәмғиәтендә, К. Иванов исемендәге кооперативта, Соловьев В.В. һәм Гришанин А. А. крәҫтиән-фермер хужалыҡтарында мал аҙығы кәрәкле күләмдә әҙерләнгән. Уларҙың тәжрибәһе көсөргәнешле миҙгелдә эштәрҙе оператив һәм аныҡ ойоштороуҙың ни тиклем мөһим булыуын күрһәтә.

Аграр секторҙа һауа температураһы менән бергә хеҙмәт көсөргәнешлеге лә арта. Сөнки мал аҙығы әҙерләү кампанияһы яйлап урып-йыйыу кампанияһына күсә.

Аграрийҙар алдағы ҡышлатыу осоронда малсылыҡ тармағын мал аҙығы базаһы менән тәьмин итеү өсөн уңайлы һауа шарттарын мөмкин тиклем һөҙөмтәле файҙаланырға тырыша.

Әммә, өлгәшелгән уңыштарға ҡарамаҫтан, алда әле эштәр етерлек. Әлеге ваҡытта бер баш шартлы малға 15,2 берәмек мал аҙығы әҙерләнгән (планда 30 мал аҙығы берәмеге).

Район хакимиәтенең ауыл хужалығы хеҙмәтендә әйтеүҙәренсә, район хужалыҡтары алдағы ҡышҡа етерлек күләмдә мал аҙығы әҙерләйәсәк. Август-сентябрҙә силос культураларын йыйып алыу һәм күп йыллыҡ үләндәрҙе икенсе тапҡыр сабыу күҙаллана.

Белгестәр билдәләүенсә, әҙерләнгән мал аҙығының сифаты һәм күләме малсылыҡтың продуктлылығына туранан-тура йоғонто яһай. Яҡшы мал аҙығы базаһы – юғары һауым, сәләмәт мал һаны һәм хужалыҡтарҙың иҡтисади тотороҡлолоғо нигеҙе. Шуға күрә хәҙер аграрийҙарҙың төп бурысы – эш темптарын һаҡлау һәм күрһәткестәрҙе планға ярашлы кимәлгә еткереү.

Ауыл хужалығы хеҙмәте фотолары