Беҙ халыҡтар берҙәмлеге менән көслө

«Күңел моңо» («Мелодия души») музыкаль-танып белеү программаһы һәр халыҡтың үҙ телен, үҙенсәлекле мәҙәниәтен һәм йолаларын һаҡлаған күп милләтле илдә йәшәүебеҙҙе тағы бер тапҡыр сағыу итеп иҫкә төшөрҙө. Беҙҙең районда ғына ла 34 милләт вәкиле йәшәй, барыбыҙҙы ла дуҫлыҡ, бер – беребеҙгә ихтирам һәм уртаҡ Ватаныбыҙға – Рәсәйгә һөйөү берләштерә. Быны йәш таланттарыбыҙ һәм Бәләбәй сәхнәһенең танылған оҫталары сағыу күрһәтте.

Ғәҙәттәгесә, программа «Ләйсән» башҡорт йыры халыҡ ансамбленең сығышы, тыуған республикабыҙҙы данлаған «Башҡортостан» йыры менән башланып китте. Был коллективтың сәхнәгә сығыуы һәр саҡ һоҡланғыс, уларҙың йырҙарының һәр нотаһында тыуған ергә, телгә, халыҡҡа һөйөү сағыла. Быны тамашасылар ҙа, башлыса Бәләбәй мәктәптәре уҡыусылары, тойҙо һәм уларҙы ихлас алҡышланы.

«Дуҫлыҡ» вокаль ансамбле составында төрлө йәштәге, төрлө милләт балалары – башҡорттар, татарҙар, урыҫтар, сыуаштар йырлай... Әммә был йәш йондоҙҙар был сарала ла яңы милли кейемдәр кейеп, төрлө телдәрҙә берҙәй яңғырауыҡлы, аныҡ, матур итеп йырланы. Ансамблдә ҡатнашыусы Александра Гончарованың һәм араларында иң бәләкәйе булған Әмирә Дәүләтшинаның яңғыҙ номерҙары ла тамашасыларҙың хәтерендә уйылып ҡалды.

Шулай уҡ тамашасылар күптән яратып өлгөргән Баженов ауыл мәҙәниәт йортонан Әлиә Шәймөхәмәтованың (мари бейеүе) һәм Һуҡырҙар йәмғиәтенең мәҙәни-спорт реабилитация үҙәге директоры Альбина Сәйфетдинованың (башҡорт бейеүе) сығыштары ла сараның матур биҙәге булды.

 «Ләйсән» ансамбле етәксеһе Нәзирә Фәрхетдинова, халыҡ көйҙәренән попурри башҡарып, тамашасыларға татар ҡурайының тылсымлы моңдарын  бүләк итте. Музыкаль-танып белеү программаһын башҡорт мәҙәниәте үҙәге етәксеһе Айгөл Бахарева бай йөкмәткеле, матур итеп алып барҙы.

Сара талантлы яҡташыбыҙ Анастасия Ганюшкинаның сығышы һәм был көндө сәхнәлә сығыш яһаған артистарҙың бергәләп сәхнәгә сығып, тамашасылар алдында баш эйеүҙәре  менән тамамланды.

Музыкаль-танып белеү программаһы йәнә бер тапҡыр беҙҙең күп милләтле районда талантлы кешеләр йәшәүен, уларҙың үҙҙәренең күңел йылыһы менән ихлас бүлешеүҙәрен күрһәтте, залдағыларға яҡшы кәйеф бүләк итте һәм беҙҙең берҙәмлегебеҙ менән көслө булыуыбыҙға тағы бер тапҡыр инандырҙы.

«Урал батыр» һарайы фотолары