+12 °С
Облачно
Дини байрамдар
28 Мая , 07:00
Изге Ҡорбан байрамында
Бөтөн мосолман өммәте 27 майҙа башланып киткән, тәрән мәғәнәгә эйә, мәрхәмәтлек, туғанлыҡ, йомартлыҡ ҡиммәттәрен көсәйткән изге Ҡорьан байрамын ҙурлап уҙғарҙы. Бәләбәй ҡалаһы һәм районы мәсеттәрендә, шулай уҡ ғаиләләрендә лә, мосолман ҡәрҙәштәр уны киң билдәләне. Иртә таңдан телефондан бер-береңде байрам менән тәбрикләү, таба аштары бешереү, ауырыуҙарҙың хәлен белеү, яҡындарға һ.б. күстәнәстәр, бүләктәр бирешеү, зыяраттарға барып, мәрхүмдәр рухына зыярат ҡылыу кеүек байрамдың асылын тәшкил иткән яҡшы ғәмәлдәр өс көн дауам итә.
Изге Ҡорбан байрамында
Райондың имам-мөхтәсибе Илдар Ғәлиевтың алдан хәбәр итеүе буйынса, иртәнге сәғәт 7-нән үк ир-ат – йәше-ҡарты – ыҫпай кейенеп, ҡалала ла, ауылдарҙа ла ғәйет намаҙына ашыҡты. Байрамдың төп сараһы ойошторолған тарихи мәсеттә ғәйет намаҙынан һуң Илдар хәҙрәт дин ҡәрҙәштәр диҡҡәт менән тыңлаған Ҡорбан байрамы, уның тарихы һ.б. тураһында тәрән эстәлекле вәғәз менән сыҡты.
Бер аҙҙан төп сара – бер Аллаһ ризалығы өсөн ҡорбан салыу башланды. Байтаҡ йылдар инде ҡорбанға һарыҡтарҙы Надеждин ауылынан эшмәкәр Әбделмалиҡ Мәжитов әҙерләй. Быйыл да малдар мәсет ихатаһына килтерелгән, һәр кем һарыҡты үҙе һайлап ала. Бында барлыҡ санитар нормалар теүәл үтәлеп, әлеге мәшәҡәтле эш көйлө бара.
– Әлеге ваҡытта байрам саралары Мәтәүбаш, Туҙлыҡыуыш, Баймырҙа, Аксаков ауылының төҙөлөп бөтмәгән мәсеттәрендә бара, ауылдаштарын һыйлау өсөн ҡорбандар салына, ҡайҙалыр ҡорбан итенән – аш, ҡайҙалыр былау бешә, – тип һөйләне Илдар хәҙрәт.
Изге байрам һәр ерҙә ойошҡанлыҡ менән үтте. Байрамдың аяҙ, ҡояшлы көнгә тура килеүе лә күркәмлек өҫтәне.
Ҡорбандарыбыҙ ҡабул булһын! Күп милләтле илебеҙ халҡына именлек, тыныслыҡ, татыулыҡ юлдаш булһын!
Автор фотолары
Изге Ҡорбан байрамында
