Бәләбәй ҡалаһының беренсе урта мәктәбе 130 йыллығын билдәләне

Тантанала ҡатнашыусыларға мәктәп директоры вазифаһын башҡарыусы Римма Ғәмбирова сәләмләү һүҙе менән мөрәжәғәт итте.

Бәләбәй районы хакимиәте башлығы Азат Сәхәбиев үҙенең сәләмләү һүҙендә уҡытыусыларҙың Һәм мәктәпте тамамлаусыларҙың Бәләбәй ҡалаһы тарихына ҙур өлөш индереүен билдәләне, шулай уҡ бер төркөм уҡытыусыларға почет грамоталары һәм рәхмәт хаттары тапшырҙы.

Башҡортостан Республикаһы Башлығы хакимиәте етәксеһе урынбаҫары-БР Башлығының Контроль идаралығы начальнигы, ошо мәктәпте тамамлаған Александр Линкевич уҡытыусыларға төплө белем биргәндәре өсөн рәхмәт әйтте, беренсе мәктәп - иң яҡшыһы, тип билдәләне!

Ул өс уҡытыусыға БР Мәғариф министрлығының почет грамоталарын тапшырҙы, ә мәктәпкә принтер бүләк итте.

Бәләбәй районы Советы рәйесе Сергей Лущиц барыһын да депутат корпусы исеменән ҡотланы һәм педагог-ветерандарға уҡыусыларҙы уҡытыуға һәм тәрбиәләүгә ҙур өлөш индергәндәре өсөн рәхмәт хаттары тапшырҙы.

Мәктәпте тамамлаусы генерал-майор Ришат Дауытовтың ҡотлауын мәктәп директоры вазифаһын башҡарыусы уҡып ишеттерҙе.

Рәсәй Фәндәр академияһы академигы, 1952 йылда беренсе урта мәктәпте тамамлаған Кев Миңнулла улы Сәлихов видео ҡотлау ебәргән.

Ул уҡытыусыларға традицияларҙы һаҡлағандары өсөн рәхмәт әйтте, уҡыусыларға үҙҙәренә һорауҙар бирергә һәм ҡыҙыҡһыныусан булыуҙарын теләне.

Сәхнәлә хәҙерге уҡыусылары мәктәп тормошонан тарихи картиналарҙы йәнләндереп, импровизацияланған фильм күрһәтте.

Һәр эпизодтан йылылыҡ, изгелек һәм элекке быуын уҡытыусыларына һәм уҡыусыларына ихтирам сағылды.

Автор фотолары