Һандар һәм факттар. Бөгөн Бәләбәй абитуриенттары ниндәй һөнәрҙәр һайлай?

Бәләбәй ҡалаһындағы ҺамДТУ филиалына 271 ғариза бирелгән – көндөҙгө, ситтән тороп һәм көндөҙгө-ситтән тороп уҡыу формалары абитуриенттары иҫәпкә алынған. Айырыуса көндөҙгө йүнәлештәргә теләүселәр күп: «Электроэнергетика һәм электротехника»ға – 47 ғариза, «Сәнәғәт һәм гражданлыҡ төҙөлөшө» – 44, ә «Мәғлүмәт системалары һәм технологиялары»на – 37. Колледждарға ҡабул итеү ҙә шул уҡ кимәлдә үтә. Бәләбәй гуманитар-техник колледжына 380 ғариза бирелгән. Лидерҙар араһында: «Информатика һәм иҫәпләү техникаһы» һәм «Машиналар төҙөлөшө» йүнәлештәре, шулай уҡ «Мәғариф һәм педагогия фәндәре». Практик йүнәлешле һөнәрҙәр ҙә популярлығын юғалтмай: электромонтер һөнәрен, шулай уҡ ашнаҡсы һәм кондитер һөнәрен үҙләштерергә теләүселәр күп.

Бәләбәй механизациялау һәм электрлаштырыу колледжында ғаризалар һаны 200-ҙән ашып киткән. Бында традицион рәүештә техник һәм аграр профилдәр көслө: абитуриенттар «Электр менән тәьмин итеү», «Агросәнәғәт комплексында электротехник системалар», шулай уҡ ауыл хужалығы техникаһын эксплуатациялау һәм ремонтлау һәм иретеп йәбештереү эше менән бәйле һөнәрҙәр һайлай.

Медицина белгестәренә лә ҡыҙыҡһыныу һаҡлана. Бәләбәй медицина колледжында «Шәфҡәт туташы эше»нә һәм «Дауалау эше»нә ҡабул итеү дауам итә: 9 класс базаһында һәр йүнәлешкә 170 - тән ашыу ғариза бирелгән, 11 класс базаһында - 30-ҙан ашыу.

Елена Петрова фотолары