Һөнәрҙәрен «тәмләп ҡаранылар»

Бәләбәй ҡалаһындағы ҺамДТУ филиалының БП-023 төркөмөнөң 3 - сө курс студенттары предприятиеларҙа практика үтә һәм тап бында уларға профессиональ һиҙемләү килә.

Ульяна Максимова төркөмдәштәре менән бергә Бәләбәйҙең «Почет билдәһе» орденлы һөт комбинатында практика үтә. Ҡыҙ өсөн практика икенсе йыһанға сумған кеүек була: һөт ҡабул итеү – ул ғилем, унда аныҡлыҡ та, иғтибарлылыҡ та, хатта интуиция ла мөһим.

«Тәүҙә барыһы ла ябай кеүек тойола: һөт машинаһы килә, бер аҙын тикшерергә алабыҙ, – тип йылмая Ульяна. –  Ә ысынында һәр цистернанан икешәр проба алырға кәрәк, артабан ысын эш башлана: майлылыҡты, тығыҙлыҡты тикшерәбеҙ, антибиотиктар юҡмы икәнен ҡарайбыҙ. Бында ашыҡмаҫҡа кәрәк, һәр ваҡ-төйәк нәмә мөһим. Миңә коллектив менән  бәхет йылмайҙы: лабораториялағы ҡыҙҙар бөтәһен дә күрһәтә, һорауҙарҙан баш тартмай, шунда уҡ аңларлыҡ итеп аңлата. Хәҙер мин аныҡ беләм: был тәү ҡарашҡа ғына еңел эш ».

Шул уҡ ваҡытта Мария Вахрушева Туймазы районының Серафимовка ауылында «Серафимовское» йәмғиәтендә (Серафимовка һөт заводы) производствоны үҙләштерә. Бында ҡыҙ һөттөң тулы маршруты менән таныша: ҡабул итеүҙән алып һауыттарға һалынғанға тиклем

Мария норматив-технологик документацияны һәм лабораторияла эшләү ҡағиҙәләрен өйрәнә, һөттөң кислоталылыҡ, майҙың һәм аҡһымдың масса өлөшө, тығыҙлыҡтың физик-химик үҙенсәлектәрен анализлау һәм өлгөләр һайлап алыуҙы үҙләштерә. Әҙер продукцияның органолептик күрһәткестәрен айырым тикшерә, төрөүҙә ҡатнаша, тауарҙың нисек маркировкаланыуын ҡарай. Практиканың мөһим өлөшө булып аҡ май етештереү менән танышыу тора: бында майлылыҡты ла, дымлылыҡты ла контролдә тотоу мөһим.

«Миңә шунда уҡ эш урынын күрһәттеләр һәм тыныс ҡына, ашыҡмайынса, нимәнән башларға кәрәклеген аңлаттылар, – тип хәтерләй Мария.  – Остаз бер тапҡыр ҙа ашыҡмай, әгәр нимәлер аңлашылмаһа: һәр ҡатмарлы мәлде түҙемлек менән тикшерә. Ҡорамалдарҙың нисек эшләүен һәм ни өсөн производствола ваҡ-төйәк нәмәләр юҡлығын аңлау күпкә еңелерәк. Практика юғары уҡыу йортонда уҡытылғанды һәр күрһәткес артында яуаплылыҡ торған реаль эш менән берләштерергә ярҙам итә».

Фотолар студенттар архивынан