Йомғаҡ яһанылар, пландар билдәләнеләр

Бәләбәй районы хакимиәте башлығы урынбаҫары Александр Смородин һәм мәғариф идаралығы начальнигы Татьяна Лапшина етәкселегендәге делегация форум эшендә әүҙем ҡатнашты. Делегация составына райондың педагогтар йәмәғәтселегенең ундан ашыу вәкиле инде.

Сара программаһы заманса белем биреүҙең көнүҙәк темаларына фекер алышыуҙарға бай булды. 20 августа эш туғыҙ тематик майҙансыҡта алып барылды, унда мәктәпкәсә белем биреү, махсус белем биреү ихтыяждары булған балалар менән эшләү, һәләтлелекте үҫтереү мәсьәләләре тикшерелде. 2026-2027 уҡыу йылына мәғариф системаһындағы үҙгәрештәргә, шул иҫәптән федераль белем биреү программаларын яңыртыуға һәм «Беҙҙең яҡ тарихы. Башҡортостан Республикаһы» курсын индереүгә айырыуса иғтибар бүленде..

Форумдың икенсе көнө педагогик һөнәрҙең абруйын күтәреү, тел төрлөлөгөн һәм тарихи хәтерҙе һаҡлау мәсьәләләренә арналды. Бүләкләү тантанаһы көндөң кульминацияһы булды, унда Бәләбәй районы педагогтары юғары кимәлдә билдәләнде.

• «Айгөл» 1-се балалар баҡсаһы тәрбиәсеһе Венера Горбунова «Мәктәпкәсә белем биреү ойошмаһының йыл педагогы» республика конкурсы лауреаты булараҡ Башҡортостан Республикаһы башлығы премияһына лайыҡ булды.
• «Йондоҙсоҡ» 2-се балалар баҡсаһы мөдире Наталья Ғәлиева социаль партнерлыҡты үҫтереүгә индергән өлөшө өсөн РФ Халыҡ мәғарифы һәм фән хеҙмәткәрҙәре профсоюзы республика ойошмаһының Почет грамотаһы менән бүләкләнде.
• «Яңы быуын» үҙәгенең өҫтәмә белем биреү педагогы һәм «Беренселәр хәрәкәте»нең беренсел бүлексәһе кураторы Алла Никулина йәштәр менән әүҙем эшләгәне өсөн БР Мәғариф министрлығының Рәхмәт хаты менән билдәләнде.

Башҡортостан Республикаһы Башлығы Радий Хәбиров ҡатнашлығындағы пленар өлөш форумдың һуңғы этабы булды, унда педагогик совет эшенә йомғаҡ яһалды. Бәләбәй районынан пленар ултырышта Александр Смородин Һәм Татьяна Лапшина ҡатнаштылар.

Бәләбәй районының ҙур педагогик советы 28 авгусҡа планлаштырылған, унда урындағы белем биреү киңлегенең үҙенсәлектәрен иҫәпкә алып, республика бурыстары аныҡланасаҡ.

Регина Иванова.