Барыһын да ҡыуандырып үҫегеҙ!

Өмә башланыр алдынан ҡатнашыусыларға Бәләбәй районы хакимиәте башлығы Азат Сәхәбиев мөрәжәғәт итте. Ул ҡала һәм район муниципалитеттары вәкилдәренә, «Берҙәм Рәсәй» партияһына ҡала биләмәһен таҙартыуҙа һәм төҙөкләндереүҙә әүҙемлек күрһәткәндәре өсөн рәхмәт белдерҙе. Балаларҙың акцияла ҡатнашыуы үҫеп килгән быуынды экологик тәрбиәләүгә булышлыҡ итә, тип билдәләне ул.

Акцияға, экологик сараның юғары ойошторолоуын билдәләп, Башҡортостандың һаулыҡ һаҡлау министры урынбаҫары Динара Еникеева, шулай уҡ Рәсәй эске эштәр министрлығы ҡарамағындағы  Бәләбәй районы буйынса йәмәғәт советы ағзалары ҡушылды.

«Билдәле булыуынса, ылыҫлы ағастар биләмәләрҙе төҙөкләндереүҙә  өҫтөнлөккә эйә, ул эстетиканы, яҡшы үҫеүен һәм экологик файҙаны берләштерә. Улар талапсан түгел, температура үҙгәреүен, һыуыҡтарҙы, ҡышҡы елдәрҙе, ҡоролоҡто яҡшы кисерә, шулай уҡ төрлө климат шарттарына яраҡлаштырылған», - тип хәбәр итте ҡала хакимиәте башлығы Татьяна Зубова.

Ағас ултыртыуҙа 8-се урта мәктәптең 4 а класы уҡыусыһы Алексей Михайлович Хазов ҡатнашты. «БИ» журналисын ул үҙе менән шулай тип таныштырҙы. Был уның икенсе ҙур экологик өмәһе. Уның әйтеүенсә, ҡалала ул 10-ға яҡын ағас ултыртҡан.

МР хакимиәтенең торлаҡ-коммуналь хужалыҡ бүлегенән хәбәр итеүҙәренсә, республика экологик акцияһында райондың бөтә ауылдары халҡы ҡатнашты. 289 төрлө ағас ултыртылған.

Йәш үҫентеләр барыһын да шатландырып үҫер, тип ышанам!

Автор фотолары