Экология. Тыйыу Юғары суд тарафынан раҫланды

Үҫемлек ҡалдыҡтарын контейнерҙарға сығарыу – законды боҙоу ул. Юғары инстанциялағы суд көнкүреш контейнерҙарының баҡсалағы ҡалдыҡтар өсөн булмауын раҫланы. Тәртип боҙоусыларға штраф түләргә тура киләсәк.

Мөрәжәғәт итеүҙең бөтә нескәлектәре 2025 йылдың 7 мартындағы 293-сө хөкүмәт ҡарарында раҫланды.

36-сы пункттың «в» подпунктында үҫемлек ҡалдыҡтарын ҡаты коммуналь ҡалдыҡтар өсөн майҙансыҡтарға түгеү тыйыла.

Сүп-сар сығарыу буйынса төбәк операторы: «Суд бер ниндәй ҙә яңы сикләүҙәр индермәне, ә ғәмәлдәге тәртипте нығытты ғына», – тип һыҙыҡ өҫтөнә ала. Үтилләштереү ҡағиҙәләрен боҙған өсөн административ штраф ҡаралған.

Әйткәндәй, быйыл 1 сентябрҙән ватан ҡануниәтендә ғәҙәти көнкүреш сүп-сары менән бергә йәшел ҡалдыҡтарҙы үтилләштереү ҡәтғи тыйыла. 89-сы Федераль законда аныҡ билдәләнә: фатирҙа аш-һыу әҙерләүҙән йәки йыйыштырыуҙан йыйылған нәмәләр – ҡаты коммуналь ҡалдыҡтар. Ә газон сапҡандан йәки емеш-еләк ағастарын һәм ҡыуаҡтарын ҡырҡҡандан һуң ҡалған бөтә нәмә бындайҙарға ҡарамай.

Иҫегеҙҙә тотоғоҙ: контейнер майҙансыҡтары ҡаты коммуналь ҡалдыҡтар өсөн генә тәғәйенләнгән. Ағас ботаҡтарын, башҡа үҫемлек, бәрәңге һабаҡтарын һәм башҡа шуға оҡшаш ҡалдыҡтарҙы контейнерҙарға ташларға һәм уларҙың эргәһенә йыйырға ярамай.

Үҫемлек ҡалдыҡтарын үтилләштереүҙең бер нисә ябай һәм дөрөҫ ысулы бар: участкала серетмә яһау, ҡоро ботаҡтарҙы һәм үҫемлек ҡалдыҡтарын яндырыу (янғын хәүефһеҙлеге талаптарын теүәл үтәгәндә рөхсәт ителә); ботаҡтарҙы ваҡлау һәм тупраҡҡа мульча ҡаплау өсөн файҙаланыу.

Был талаптарҙы үтәү – властың теләге түгел, ә ҡалдыҡтар менән цивилизациялы эш итеүгә аҙым, һөҙөмтәлә был тәбиғәтте лә, аҡсаны ла һаҡлай.

Фото «БИ» архивынан