«Беҙҙең заман геройҙары»

Китапханасылар балаларға махсус хәрби операция башланыуы, шулай уҡ беҙҙең замандың ысын геройы кем булыуы тураһында һөйләне.

– Геройҙарыбыҙ – күптән түгел генә беҙҙең арала Бәләбәйҙә йәшәгән һәм эшләгән, балаларын тәрбиәләгән кешеләр. Ә бөгөн улар – беҙҙең батыр ил һаҡсыларыбыҙ! – тип хәбәр итте сараны алып барыусы Марина Давыдова.

Китапханасы Фәриҙә Ханнанова балаларҙы сара ҡунағы – махсус хәрби операцияла ҡатнашыусы, хәрби хәрәкәттәр ветераны Рөстәм Ринат улы Мирсаев менән таныштырҙы.

Тыуған илде һаҡлаусы мәктәп уҡыусыларына үҙенең хәрби тәжрибәһе, ауыр мәлдәрҙә ниндәй белем һәм оҫталыҡ ярҙам итеүе тураһында һөйләне. Рөстәм Ринат улы һүҙҙәренсә, улар араһында иң мөһиме – физик әҙерлек һәм сыҙамлыҡ. Үҙ-ара ярҙам итеү, иптәшлек һәм үҙ-үҙеңде тота белеү ҙә мөһим.

Бәләбәй геройы осрашыуҙа ҡатнашыусыларҙың һорауҙарына яуап бирҙе. Үҙенең тәжрибәһе нигеҙендә ветеран йәш кешеләргә ябай, әммә мөһим кәңәштәр бирҙе: дуҫлыҡты ҡәҙерләргә, яҡшы уҡырға, тәртипле булырға һәм һәр ваҡыт башҡаларға ярҙам итергә.

«Иҫегеҙҙә тотоғоҙ, һәр эшегеҙ һәм ҡарарығыҙ киләсәккә йоғонто яһай. Белемгә ынтылығыҙ, күнекмәләрегеҙҙе үҫтерегеҙ һәм ауырлыҡтарҙан ҡурҡмағыҙ. Иң мөһиме – намыҫлы, изге күңелле һәм ғәҙел кеше булып ҡалыу», – тине ул.

Патриотик сәғәт аҙағында уҡыусылар «Геройҙар һәм алыштар: тарих биттәре» китап күргәҙмәһе менән танышты. Унда төрлө баҫмалар тәҡдим ителә. Айырыуса балаларҙы һалдаттарҙың батырлыҡтары тураһында әҙәби  әҫәрҙәр һәм дрондар һәм хәҙерге һуғыштың йөҙөн үҙгәрткән яңы технологиялар тураһында техник әҙәбиәт ҡыҙыҡһындырҙы.

Батырлыҡ сәғәте тарих дәресе генә түгел, ә мәктәп уҡыусыларында илһөйәрлек һәм үҙ иле һәм бөгөнгө геройҙар менән ғорурланыу тойғоһо тәрбиәләүҙә мөһим аҙым булып тора.

Фотолар китапхананан