Көслө шартлау һәм ҡуйы төтөн: Приютта ниндәй янғын?

Янғын тураһында хәбәр ашығыс хеҙмәттәргә яҡынса 17.15 сәғәттә килә. Рәсәй Ғәҙәттән тыш хәлдәр министрлығының БР буйынса Баш идаралығының Бәләбәй район-ара күҙәтеү эшмәкәрлеге һәм иҫкәртеү эштәре бүлегенән аныҡлауҙарынса, Ғәҙәттән тыш хәлдәр министрлығы подразделениелары килгән мәлдә янғын бер нисә объектҡа таралған була.

Ут 9×9 метр ҙурлыҡтағы торлаҡ йортто, шулай уҡ һәр ҡайһыһы  3×5 метр майҙанлы мунсаны һәм һарайҙы ялмап алған була. Бөтә ҡоролмалар бүрәнәнән, был янғын таралыуын тиҙләтә. Хәлде көслө ел дә ҡатмарлаштыра, ул осҡондар тарата һәм күрше участкаларға ла ут ҡабыуға сәбәпсе була. Һөҙөмтәлә күрше йорттарҙың береһе ныҡ зыян күрә.

Уттың артабан таралыуына юл ҡуймау өсөн, янғын һүндереүгә Рәсәй Ғәҙәттән тыш хәлдәр министрлығының профессиональ янғын һүндереүселәре һәм Баженов ауыл советының ирекле янғын һүндереү командаһы ҡушыла. Уларҙың килешеп эш итеүе башта янғын таралыуға юл ҡуймай, ә һуңынан тулыһынса һүндерергә мөмкинлек бирә.

Шаһиттар ҡуйы төтөн һәм көслө ялҡын күргәндәр генә түгел, ә киҫкен көслө тауыш та ишеткәндәр, күптәр уны шартлау менән сағыштыра. Тәүге сәғәттәрҙә киң мәғлүмәт сараларында һәм социаль селтәрҙәрҙә шартлауҙың  сәбәбе мунсала һаҡланған карбидлы төргәк булыуы тураһында фараз ителә. Әлеге ваҡытта был мәғлүмәт тикшерелә – һуңғы һығымталарҙы Ғәҙәттән тыш хәлдәр министрлығы тәфтишсеһенә яһарға кәрәк.

Бәхеткә күрә, ваҡиға һөҙөмтәһендә бер кем дә зыян күрмәгән. Әле урында белгестәр эшләй, улар ваҡиға сәбәптәрен асыҡлай.

Фотолар Рәсәй Ғәҙәттән тыш хәлдәр министрлығынан