Ике тапҡыр Советтар Союзы Геройы Муса Гәрәевтең 100 йыллығы билдәләнде

9 июлдә Муса Гәрәевтың тыуыуына 100 йыл тулды. Ошо уңайҙан Өфөнөң Еңеү паркында уның ҡәберенә сәскәләр һалынды, тантаналы митинг уҙҙы. Муса Гәрәев Бөйөк Ватан һуғышы йылдарында 250-гә яҡын осош яһап, дошманды тар-мар итеүҙә ҡыйыулыҡ һәм батырлыҡ өлгөһө күрһәтә.

Первушин аэродромында ла Муса Гәрәевтең тыуыуына 100 йыл тулыуға арнап авиаһәүәҫкәрҙәр слеты ойошторолдо. Унда 100-ҙән ашыу пилот ҡатнашты. Тамашасылар өсөн үҙенсәлекле программа булды. Мәҫәлән, ретро-самолеттар күргәҙмәһен ҡарарға мөмкин ине. Экспозицияға 1942 йылда сығарылған легендар У-2 самолеты ҡуйылды. Бер майҙансыҡта 50-гә яҡын осҡосто күрергә булды.