Рәсәй прокуратураһына – 104 йыл!

Уҙған йылда район гәзитенә прокуратураның эш йомғаҡтары тураһында Бәләбәй район-ара прокуроры Руслан Мырҙабаев һөйләне.

– Гәзит уҡыусыларыбыҙға прокуратура органдарының функциялары хаҡында һөйләгеҙ әле, 2025 йыл өсөн ниндәй эш йомғаҡтары яһарға мөмкин?

– Прокуратура эшмәкәрлеге бик күп яҡлы, кеше тормошоноң бөтә өлкәләрен, йәмғиәт һәм дәүләт мәнфәғәттәрен тиерлек үҙ эсенә ала. Был Рәсәй Федерацияһы Конституцияһының үтәлешен һәм закондарҙың үтәлешен күҙәтеү, гражданлыҡ, административ һәм енәйәт эштәре буйынса судтарҙа ҡатнашыу, координация һәм хоҡуҡ сығарыу эшмәкәрлеге.

Уҙған йылда район-ара прокуратура Бәләбәй районында законлылыҡты һәм хоҡуҡ тәртибен тәьмин итеүҙә ҙур һөҙөмтәләргә өлгәште. Уҡыусыларҙың иғтибарын һандарға йүнәлтмәйенсә, прокуратураның хоҡуҡ һаҡлау функцияһы буйынса айырым мәсьәләләргә ентекләберәк туҡталырға теләйбеҙ.

Аңлатыу һәм иҫкәртеү эштәре алып барылһа ла, граждандарыбыҙ элеккесә мутлашыусыларҙың хәйләләренә эләгә, уларға үҙҙәренең аҡсаларын йәки банктарҙан заем аҡсаларын күсерә. Былтыр ошо енәйәтселәрҙең ғәмәлдәренән район халҡына 46 миллион һумдан ашыу зыян килтерелгән.

Прокуратура полиция тәфтишселәре менән берлектә мутлыҡ схемаларында ҡулланылған банк иҫәптәрен билдәләй, уларға граждандарҙан урланған аҡса күсерелә. Ҡайһы бер осраҡтарҙа артабан иҫәптән сығарылғанға тиклем был иҫәптәрҙе арестҡа алыу мөмкин була.

2025 йылда прокуратура социаль яҡтан көсһөҙ граждандар мәнфәғәтендә судҡа күрһәтелгән иҫәп хужаларынан 2,5 миллион һумлыҡ нигеҙһеҙ байыу суммаһын һәм башҡаларҙың аҡсаһын файҙаланған өсөн проценттарҙы түләтеү тураһында 14 дәғүә ғаризаһы ебәрҙе.

Район халҡын дарыуҙар менән тәьмин итеү граждандарҙы киҫкен борсоған һәм прокуратура өсөн өҫтөнлөклө эш йүнәлеше булып ҡала. Ҡыҙғанысҡа ҡаршы, пациенттар һәр ваҡыт ваҡытында һәм тулы күләмдә тейешле медицина препараттарын һәм изделиеларын ала алмай. Граждандарҙың боҙолған хоҡуҡтарын тергеҙеү маҡсатында прокуратура бер нисә тапҡыр төбәк һаулыҡ һаҡлау министрына һәм район дауаханаһының баш табибына тәҡдимдәр индерҙе, судҡа пациенттарҙы медикаменттар менән өҙлөкһөҙ тәьмин итеү тураһында ғаризалар ебәрелде. Ҡайһы бер осраҡтарҙа беҙ ошо министрлыҡтан граждандарҙың дарыуҙар һатып алыуға тотонолған аҡсаһын иҫбатлай һәм түләтә алабыҙ. Былтыр граждандар мәнфәғәтендә судҡа 111 мең һум компенсация тураһында ғариза ебәрелде.

Прокуратура органдарының иғтибар үҙәгендә граждандарҙың хеҙмәт хоҡуҡтарын үтәү ҡала. Был өлкәлә шуны билдәләп үтергә кәрәк: беҙ ике бәлиғ булмаған бала мәнфәғәтендә, уларҙың атаһы производствола йәрәхәтләнгәндә һәләк булған, ата-әсәһен юғалтыу арҡаһында килтерелгән мораль зыянды ҡаплау иҫәбенә эш биреүсенән һәр балаға 250 мең һум аҡса түләттек.

Район халҡы торлаҡ-коммуналь хужалыҡ эшен үтә тәнҡитләй, прокуратура  бында ла уларҙың мәнфәғәттәрен яҡлай. Мәҫәлән, беҙҙең эшмәкәрлектән һуң Бәләбәй ҡалаһының күп фатирлы йорттарының береһендә йәшәүселәргә идара итеүсе компания нигеҙһеҙ иҫәпләгән 70 мең һум күләмендәге аҡса яңынан иҫәпләнде.

Бер әңгәмә сиктәрендә прокуратура эшмәкәрлегенең бөтә йүнәлештәрен дә асып булмай, был уның дәүләт власы органдары системаһындағы эшенең  ҡатмарлылығы, күп яҡлылығы һәм әһәмиәте тураһында һөйләй.

Бөгөн район-ара прокуратурала юғары һөнәри һәм бурысына тоғро булған белгестәр хеҙмәт итә.

Һөнәри байрам көнөндә Бәләбәй район-ара прокуратураһы коллективына, уларҙың ғаиләләренә, шулай уҡ пенсионерҙарға һәм прокуратура органдары ветерандары Р.Х. Зиннәтуллинға, И. А. Сафиуллинға, Ш. Ф. Яҡуповҡа, Е. Г. Желтиковаға көндәлек хеҙмәттәре һәм законға тоғро хеҙмәттәре өсөн рәхмәт белдерәм.

Елена Петрова фотолары