Кредиттар буйынса бурыстар арҡаһында

Өфөлә транспорт полицейскийҙары наркотик матдәләр таратыусы курьерҙы ҡулға алды, тип хәбәр иттеләр Рәсәй Эске эштәр министрлығының транспорт өлкәһендәге линия идаралығында. Бәләбәй районында йәшәгән йәш егет тыйылған матдәләр партияһы менән тотолған, был уның криминаль донъяға оҙайлы түгел, ләкин хәүефле юлының иң юғары нөктәһе булған.

Барыһы ла былтыр июль айында башланған. Приют ҡасабаһынан 18 йәшлек егет кредиттар буйынса 40 мең һум бурысы менән ҡатмарлы финанс хәлендә ҡалғандан һуң тиҙ аҡса эшләү ысулдарын эҙләй башлаған. Социаль селтәрҙә ул Өфөлә эшкә урынлашыу хаҡында ҡыҙыҡтырғыс иғланға юлыға. Һылтанма буйынса күскәс, ул уға төбәк биләмәһендә наркотиктар менән йәшерен урындарҙы булдырырға тәҡдим иткән вәкил менән бәйләнешкә ингән.

Бурыстарҙы тиҙ ҡаплау һәм еңел аҡса эшләү перспективаларынан «һуҡырайған» йәш кеше ойошторолған енәйәтсе төркөм эшмәкәрлегендә ҡатнашырға ризалашҡан. Ул курьер-таратыусы «һөнәренең» нескәлектәрен үҙләштерә һәм үҙенең енәйәти бурыстарын үтәүгә тотоноу өсөн тиҙҙән Өфөгә юллана. Башҡортостандың баш ҡалаһына килгәс, ул наркотиктар һатып алған. Йәшәү өсөн ул Приюттан таныштарына мөрәжәғәт иткән, улар ҡалала фатирҙы ҡуртымға алған булған. Дуҫтары шикләнмәгән, күрәһең, ҡунаҡ  тормошоноң ҡараңғы яғын белмәгәндәрҙер. Улар булмаған ваҡытта йәки төндә, йәш кеше наркотиктарҙы артабан һатыуға әҙерләп, уларҙы айырым пакеттарға төрөү менән шөғөлләнгән. Әммә енәйәт эшмәкәрлеге иғтибарһыҙ ҡалмаған. Транспорт полицияһы хеҙмәткәрҙәре «Дим - Өфө» участкаһында енәйәтсене ҡулға алған. Үҙе менән бер нисә төргәктә наркотик матдәләр - метилэфедрон табылған.

Хәҙер йәш енәйәтсене суд тикшереүе көтә. Уға 20 йылға тиклем иректән мәхрүм ителеү янай.