Суд эшенә тоғролар

Кәңәшмә бөтә республиканан суд берләшмәһе вәкилдәрен йыйҙы. Сарала ҡатнашыусылар суд эшмәкәрлегенең төп йүнәлештәрен тикшерҙе, тәжрибә уртаҡлашты һәм артабанғы үҫеш йүнәлештәрен билдәләне.

Тантаналы сарала «Фемида» күсмә почетлы призы тапшырылды. Ғәҙеллек һәм яҡшы эште символлаштырыусы награда йыл йомғаҡтары буйынса иң юғары һөҙөмтәләр күрһәткән коллективтарға бирелә. Быйыл «Фемида» Бәләбәй ҡала суды хеҙмәткәрҙәренә тапшырылды.

БР Юғары суды рәйесе Раил Шәйҙуллин суд рәйесе Лениза Гәрәеваға бүләкте шәхсән үҙе тапшырҙы. Уның етәкселегендә суд, юғары кимәлдәге профессионализм, эштәрҙе оператив һәм сифатлы итеп ҡарауҙы күрһәтеп, юғары күрһәткестәргә өлгәште. Бәләбәйҙәрҙән тыш, Мәләүез һәм Салауат район-ара судтары коллективтары эштәге юғары ҡаҙаныштары өсөн наградалар алды.

Бынан тыш, кәңәшмә барышында «2025 йылда иң яҡшы дәүләт граждан хеҙмәткәре» премияһы менән бүләкләү тантанаһы уҙҙы, ул хеҙмәт бурыстарын башҡарыуҙа юғары һөҙөмтәләр өсөн тапшырыла.

Республиканың район һәм ҡала судтарының дәүләт граждан хеҙмәткәрҙәре араһында «Иң яҡшы бүлек начальнигы» номинацияһында Бәләбәй ҡала судының суд эштәрен тәьмин итеү бүлеге начальнигы Виктория Лишманова билдәләнде. Уның профессионаллеге, яуаплылығы һәм бүлек эшен һөҙөмтәле ойоштора белеүе судтың уңышлы эшләү нигеҙенә әүерелде.

«Был наградалар айырым коллективтарҙың һәм хеҙмәткәрҙәрҙең ҡаҙаныштарын таныу ғына түгел, ә тотош Башҡортостан суд системаһының юғары эш кимәлен дәлилләү булды», – тип билдәләне Лениза Гәрәева.

Фотолар Бәләбәй ҡала судынан бирелде