Халыҡтың күңел көҙгөһө, уның мәҙәни мираҫы

Алып барыусы, «Ләйсән» башҡорт йыры халыҡ ансамбле етәксеһе Нәзирә Фәрхетдинова сараны республикабыҙҙа дәүләт телдәренең береһе булған башҡорт теле тураһында һөйләп башланы. Сарала ҡатнашыусылар башҡорттар күпләп йәшәгән төбәктәр, телдең үҙенсәлекле өндәре хаҡында белде. Осрашыуҙы башҡорт халыҡ йыры «Айҙар ғынайым»ды башҡарған «Дуҫлыҡ» йыр ансамбле дауам итте. Һуҡырҙар йәмғиәтенең мәҙәни-спорт реабилитация үҙәгенән Альбина Сәйфетдинова башҡарыуындағы сыуаш халҡының халыҡ бейеүе сараның биҙәге булды.

«Дуҫлыҡ» ансамбле солисы Александра Гончарова русса «Гляжу в озера синие» йырын башҡарҙы. Әминә Ғәбделхәлимованың тыуған яғына һөйөү менән башҡорт телендә башҡарған «Башҡортостан - илгенәм» йыры ла бөтәһенең дә күңеленә хуш килде. Ансамблдең иң бәләкәй ҡатнашыусыһы Әмирә Дәүләтшина билдәле татар шағиры Ғабдулла Туҡайҙың «Туған тел» шиғырын һөйләне.

Осрашыуға килгән балалар ҙа ябай тамашасылар ғына түгел, ә төрлө конкурстарҙа ихлас ҡатнашыусылар ҙа булды. Улар милли мәҡәлдәрҙә һәм рус әйтемдәрендә ҙур ҡыҙыҡһыныу менән уртаҡлыҡ тапты. Алып барыусы башҡорт йәки, мәҫәлән, әзербайжан мәҡәлдәрен атаны, ә балалар мәғәнәһе буйынса оҡшаш рус телендәгеләрен хәтергә төшөрҙө. Шулай уҡ балалар йомаҡтар систе, фразеологизмдарҙың мәғәнәһен аңлатты, милли уйындарҙа ҡатнашты.

Күңел асыу, танып белеү сараһы «Ләйсән» башҡорт йыр ансамбле һәм «Дуҫлыҡ» вокаль ансамбле башҡарыуында «Мин башҡортса һөйләшәм» йыры менән тамамланды.

Фотолар: милли-мәҙәни һарай