Диңгеҙ пехотаһы характерын сыныҡтыра

Яҡташыбыҙ хеҙмәттәштәре менән тәүге тапҡыр Кубандә «Геройҙар сусаҡтары» йәки Бәләкәй Мамай ҡурғаны мемориаль комплексында булған көнөн ҙур тулҡынланыу менән иҫкә ала. Унда Бөйөк Ватан һуғышы геройҙарына 15 метрлыҡ һәйкәл ҡуйылған. Бында, 121,4 исемһеҙ бейеклектә, 1943 йылда фашистар менән алышта 20 меңгә яҡын совет һалдаты һәләк була.

– Әлбиттә, һәр егет кеүек үк, мин дә элиталы ғәскәрҙәргә эләгергә хыяллана инем, шуға күрә 1999 йылда мине диңгеҙселәр сафына алыуҙарына  ҡыуандым. Диңгеҙ пехотаһында хеҙмәт итеүе ауыр, әммә ҡыҙыҡ. Даими күнекмәләр, тулы хәрби кейемдә марштар, төрлө ҡоралдар өйрәнеү –  быларҙың барыһы ла беҙҙән, әлегә «йәшел» егеттәрҙән, намыҫ һәм Ватан һағында торорға әҙер яугирҙарҙар яһаны. Диңгеҙ пехотаһы беҙҙе ғүмерлеккә сыныҡтырҙы, - ти Марсель Низиб улы.

Тап армия хеҙмәте йылдары ир-егеттәрҙең артабанғы профессиональ юлын билдәләй. Һалдат ашханаһын кадрҙар менән тәьмин итеүҙә ҡыйынлыҡтар килеп тыуғанда, часть командованиеһы Башҡортостан егетен һайлай, уның шәхси эшендә һөнәри әҙерлеге тураһында документтар була.

– Армияға тиклем көндөҙ тыуған Нефтекама ҡалаһында иретеп йәбештереүсегә, ә кискеһен ашнаҡсыға уҡыным. Әсәйем, бала саҡтан уҡ әҙерләргә яратыуымды күреп, ваҡытымды бушҡа үткәрмәҫкә, ошо белгеслекте лә алырға кәңәш итте. Атайыбыҙ үлгәндән һуң, ул ағайым менән мине бер үҙе тәрбиәләне, шунлыҡтан беҙ бала саҡтан уҡ уға ярҙам итергә тырыштыҡ. Ул уның эштән ҡайтыуына ашарға әҙерләү минең бурысым ине.

Әсәйем күп йылдар һатыусы, һуңынан кондуктор булып эшләне. Миңә тиклем нәҫелебеҙҙә ашнаҡсылар булманы, – тип уртаҡлашты Марсель Латипов.

Нәҡ Крымскиҙа, һалдат ашханаһы мөдире улының туйында, яҡташыбыҙ тәүгә нәзәкәтле ризыҡтар әҙерләгән шеф-ашнаҡсы ирҙе күреп ҡала. Егеттә юғары кухня өлкәһендә шундай уҡ виртуоз булыу теләге тыуа, армиянан ҡайтҡандан һуң ул иретеп йәбештереүсе түгел, ә ашнаҡсы булып эшләй башлай.

– Бер нисә йыл Нефтекама ҡалаһында абруйлы ресторандарҙа һәм күңел асыу үҙәктәрендә эшләнем. 2011 йылда «Контур» фирмаһы саҡырыуы буйынса Бәләбәйгә килдем һәм 10 йылдан ашыу Бәләбәй ҡалаһында һәм Приют ҡасабаһында «Феста» пиццерияһында, шулай уҡ «Дуҫтар» кафеһында эшләнем. Йыл ярым элек Октябрьский ҡалаһында ресторанда өлкән ашнаҡсы булдым. 2023 йылда Бәләбәй ҡалаһында ресторан асырға булдым. Ремонт эштәре йылдан ашыу барҙы, һәм мин көн һайын бында Октябрьскийҙан килеп йөрөнөм. Әсәйем һәм туғандарым ресторан асылғанға тиклем пландарыбыҙ хаҡында белмәне. Минең яҡындарымдың беҙҙең уйҙан нимә килеп сығыр, тип тулҡынланыуҙарын теләмәнем, – тип уртаҡлашты шеф-ашнаҡсы.

Бәләбәй ике ҡыҙ тәрбиәләгән Латиповтар ғаиләһе өсөн тыуған ҡалаға әүерелгән. Улар ике йыл эсендә «Марсель» ресторанының халыҡ һәм уның ҡунаҡтары араһында популярлыҡ яулауына бик шат. Латиповтың командаһы - абруйлы төбәк һәм Бөтә Рәсәй профессиональ оҫталыҡ конкурстарында ҡатнашыусы һәм призер. Бәләбәй тураһында «Башҡорт каникулдары» телетапшырыуы сығарылыштарының береһендә «Марсель» ресторанының фирма ризыҡтары хаҡында ла сюжет бар.

Фотолар Латиповтарҙың ғаилә альбомынан