Бешһен әйҙә, Аксаковтың балыҡ һурпаһы!

Фестиваль Сергей Аксаков яратҡан алпауыттар аш-һыуы традицияларын тергеҙеү ынтылышы булараҡ күҙаллана. Яҙыусы натуралист ҡына түгел, һунарсылыҡ һәм балыҡсылыҡ шатлыҡтарын яҡшы белгән, яңы бешкән балыҡ һәм һунар ризыҡтарын яратҡан. Уның тормошоноң тап ошо яғы байрамдың нигеҙе булып тора.

Фестиваль өсөн майҙансыҡ булып яҙыусының олатаһы Степан Михайловичтың нәҫелдән нәҫелгә күсеп килгән имениеһы тора. Бында, тарихи урында, «заман тәме» идеяһы айырыуса тәбиғи яңғырай.

Сарала кафе һәм ресторан хужалары, шулай уҡ балыҡсылыҡ һөйөүселәр, балыҡтан ризыҡ әҙерләүҙе яҡшы белгәндәр ҡатнашты.

Бәләбәйҙәр ҙә хуш еҫле балыҡ һурпаһына сират торҙо. Делегация составында Надеждин ауылындағы Аксаковтар ғаиләһе музейы мөдире Татьяна Зима барҙы. Уның өсөн был фестиваль айырым мәғәнәгә эйә: аксаковтар ғаиләһенең мираҫы менән бәйләнеш бында музей залдарында ғына түгел, ә ябай кешелек ҡыуаныстарында ла һиҙелә – ҡайнар һурпа еҫендә, ҡаҙан янында әңгәмәләрҙә, дөйөм кәйефтә.

– Балыҡ һурпаһын музей усадьбаһы алдындағы майҙанда бешерҙеләр. Ҡайнап торған балыҡ һурпаһы еҫен һүҙ менән әйтеп еткереү мөмкин түгел. Бер табаҡта өс төр балыҡ, оҫталарҙың йәшерен ингредиенттары, йәшел тәмләткестәр еҫе, һәм, әлбиттә, затлы һурпанан ауыҙ итергә теләүселәрҙән сираттар. Үҙ сиратыңды көтөп алыу ҡыйын булманы. Фестивалгә килгән бик күп ҡыҙыҡлы кешеләр менән аралаша алдыҡ. Әйткәндәй, саф һауала һурпа тәмле булды, айырыуса музыка уйнап торғанда, - тип уртаҡлашты Татьяна Александровна.

Фестиваль ҡунаҡтары һый-ниғмәттән генә ләззәтләнеп ҡалманы, паркта йөрөнө, усадьбаның музей комплексын ҡараған. Бәләбәй делегацияһы өсөн был Бәләбәй районы һәм Аксаковтар ғаиләһе тарихы менән үҙенсәлекле осрашыу ҙа булды, бындай ваҡиғалар уны һаҡлап ҡалырға ярҙам итә.

Яҡташтарыбыҙ арыған, әммә бик яҡшы кәйеф менән ҡайтҡан. «Байрамға яңы идеялар тыуһын һәм дауамы булһын», - ти улар.  Ә беҙ мотлаҡ киләсәкбеҙ.

- Бындай ваҡиғалар тарихты тойорлоҡ һәм яҡын итә. Әгәр был традиция бер усадьба сиктәренән сығып, бөтә Аксаков урындарын үҙ эсенә алһа, бик яҡшы булыр ине, – тип билдәләне Татьяна Зима.

Т. А. Зима архивынан фотолар