Бәхетле тамамланған әкиәт

Парк биләмәһендәге сараларҙың береһендә Дәүләкән ирекмәндәре ояһынан ҡолап төшкән тейен балаһын күреп ҡала. Ҡыҙҙар аптырап ҡалмай, шунда уҡ бәләкәсте парк хеҙмәткәрҙәренә тапшыра. Иң мөһиме – әсәһен табыу була.

Парк һаҡсылары һәм битараф булмаған кешеләр, тейен балаһының әсәһе килеп сығыр тип өмөтләнеп, төнгә тиклем оя янында дежурҙа тора. Ҡыҙғанысҡа ҡаршы, ул  күренмәй. Моғайын, һыуһарҙарҙың табышына әйләнгәндер. Был йәнлектәр парк эргәһендәге урман һыҙатында йәшәй һәм йыш ҡына тейендәргә хәүеф тыуҙыра.

«Мираҫ» учреждениеһында һөйләүҙәренсә, тейен балаһын ветеринария клиникаһына алып баралар, унда белгестәр уны ҡарай, тәрбиәләү буйынса тәҡдимдәр бирәләр һәм паркка кире ҡайтаралар. Ярҙам көтөлмәгән яҡтан да килеп етә: парк биләмәһендә урынлашҡан кафе хеҙмәткәрҙәренең береһе шунда уҡ кәзә һөтө алып килә – тейен балаларын тап кәзә һөтө менән туҡландыралар икән (составы буйынса ул һыйыр һөтөнә ҡарағанда тейендекенә яҡыныраҡ).

Тейен балаһын мәҙәниәт учреждениеһы хеҙмәткәре Ольга Саврина ҡарамаға ала. Тәүҙә ике сәғәт һайын, шул иҫәптән төндә лә, ашатырға тура килә. Хәҙер бәләкәскә бер ай самаһы: ул күҙҙәрен асҡан, һирәгерәк һәм күберәк ашай башлаған, рационына әкренләп сәтләүек индерә башлағандар. Ольга уны тәбиғи тауыштарға, еҫтәргә һәм иректә йәшәүгә күнегеп китһен өсөн даими рәүештә паркта йөрөтөп ала.

«Хәҙер тейен балаһына көс керҙе, һиҙелерлек нығынды һәм, айырыуса шатлыҡлы, шуҡ характерын күрһәтә башланы! – тип һөйләне мәҙәниәт учреждениеһы методисы Анна Кузнецова. – Ә бит тап ошо теремеклек – барыһы ла яҡшы булыуының билдәһе. Һәм барлыҡ битараф булмағандарға айырым рәхмәт әйтергә теләйем: улар ҡатнашлығынан башҡа был тарих булмаҫ ине».

Фотолар «Мираҫ» учреждениеһынан