Изгелек кадрҙары

Учреждение директоры Оксана Андрееваның башланғысы был. «Беҙ йыл һайын йортта йәшәүселәр һәм хеҙмәткәрҙәребеҙ өсөн күсмә фотосессиялар үткәрергә тырышабыҙ. Костюмдар үҙебеҙҙеке. Күптәр өсөн был фотолар ябай  кадрҙар ғына түгел, ә ысын байлыҡ: үҙеңде үҙенсәлекле тойоу, яңынан күрергә теләгән мәлде һаҡлау мөмкинлеге. Фотосессия – ул бәләкәй генә байрам, ул хәтерҙә һәм альбомда һаҡлана», – тип иҫәпләй Оксана Владимировна.

Тормош көҙөн, йылдың көҙөн кеүек үк, бошонмайса ҡаршыларға кәрәк. Һәм бындай бәләкәй байрамдар был көҙҙә олоғайыуҙы түгел, ә үҙенсәлекле яҡтылыҡты – тәжрибә, изгелек һәм тыныс шатлыҡ яҡтылығын күрергә ярҙам итә. Был фотолар йылмайырға һәм кеше йылыһының ни тиклем күп нәмә аңлатҡанын иҫкә төшөрөргә сәбәп булһын.