Үткән һәм киләсәк символы

– Төҙөүселәр яңы объектты һыу һәм электр менән тәьмин итеү, видеокүҙәтеү өсөн инженер селтәрҙәре һалды, биләмәне декоратив яҡтыртыу өсөн терәк ҡуйҙы, тротуар плиткаһы һалды, эскәмйәләр һәм сүп һауыттары ҡуйҙы. Автотулҡаларға, велосипед юлына асфальт түшәлгән. Декоратив яҡтыртҡыстар араһында йәйәүлеләр үткәүелдәрен яҡтыртыу өсөн гобо-проекторҙар ҡуйылған. Ҡала халҡының яратҡан мөйөшөндә сәскәләр, декоратив ҡыуаҡтар, газон үләне ултыртылған. Ҡоро фонтан ҡуйыу (төҙөүселәр ҡорамалдар килтереүҙе көтә) һәм декоратив яҡтыртыуҙы монтажлау буйынса эш тамамланыу стадияһында. «Ер кендеге» архитектура объектын донъяның тактиль картаһы менән тәьмин итеүҙе көтәбеҙ, – тип һөйләне район хакимиәтенең архитектура бүлеге начальнигы Айгөл Иванова.

2026 йылда, «Новаторҙар бульвары» проектын тормошҡа ашырыуҙың икенсе этабында, йәмәғәт киңлегенең тематик зоналарын тулыландырыу башлана: «Белем юлы», «Хәстәрһеҙ йәшлек», «Трансформация майҙаны», «Ижад майҙаны». Архитекторҙар фекеренсә, улар Ҡыҙыл урамынан алып Үҙәк мәҙәниәт һарайы алдындағы майҙанға тиклем өҙлөкһөҙ үҫешкән тормош таҫмаһы булып торасаҡ, ҡаланың хәрәкәтен һәм үҫешен, шулай уҡ унда йәшәүселәрҙең ижади юлын символлаштырасаҡ.

Бульварҙа бәләкәй архитектура формалары, бизибордтар, бәүелсәктәр, шезлонгтар, куб-трансформерҙар рәүешендәге эскәмйәләр һәм өҫтәлдәр ҡуйыласаҡ. Шулай уҡ модуль бәҙрәфле сауҙа павильоны барлыҡҡа киләсәк. «Ижад майҙанында» төрлө мәғлүмәт объекттары урынлашасаҡ.

– «Новаторҙар бульвары» проектының архитектура-художество концепцияһы төҙөкләндерелгән йәмәғәт киңлеге буйлап урынлашҡан сауҙа нөктәләре, дарыуханалар һәм башҡа предприятиеларҙың яҙыуҙарын берҙәм стилдә биҙәүҙе күҙ уңында тота. Эшҡыуарҙар Әмиров исемендәге урамда  төҙөкләндереүҙең комплекслы сиктәренә терәлеп торған торлаҡ булмаған биналарҙың фасадтарын федераль дизайн-кодтарға ярашлы биҙәү буйынса кәрәкле саралар күрә башланы, – тип билдәләне райондың баш архитекторы.

«БИ» белешмәһе

«Новаторҙар бульвары» проектын тормошҡа ашырыуҙа Башҡортостан Республикаһы Хөкүмәте, Башҡортостан ҡалаларын үҫтереү институты, БР Торлаҡ-коммуналь хужалыҡ министрлығы, «Аффинум» архитектура бюроһы, Бәләбәй районы хакимиәте һәм Бәләбәй ҡалаһы халҡы ҡатнаша.

Елена Петрова фотолары