Һәр кем ағас ултыртырға тейеш!

Бәләбәй механикалаштырыу һәм электрлаштырыу колледжының, гуманитар-техник колледждың техник бүлеге студенттары дәррәү эшкә тотондо – улар алдан һөрөп әҙерләп ҡуйылған урынға ылыҫлы ағастар үҫентеләрен ултыртырға кереште.

Изге эшкә башланғыс һалынды, Бәләбәй районында “Йәшел Башҡортостан” акцияһына старт бирелде. Тиҙҙән Сиушка ауылы эргәһендәге тауҙа ҡарағай һәм шыршы урманы шаулаясаҡ!

Бәләбәй урман хужалығы хеҙмәткәрҙәре студенттарға инструктаж үткәрҙе.

– Үҫентеләрҙе ултыртҡас, улар араһын утап торорға кәрәк буласаҡ, сөнки үлән баҫып китеү ихтималы бар, – тип һөйләй урман мастеры Владимир Иванов. – Унан һуң санитар таҙартыу, һирәкләү кәрәк буласаҡ. Урман ултыртыу өсөн киңлеге 30 м һәм оҙонлоғо бер км ҙурлығындағы дүрт деләнкә бүленде. Өсөһөндә эш ҡайнай инде...

Урмандарҙы яңыртыу – бер көндә эшләнә торған эш түгел. Урмансылар бер нисә участкаға ағастар ултыртҡан инде, хәҙер – ирекмәндәрҙең сираты. “Йәшел Башҡортостан” акцияһы бөтә республикала уҙғарыласаҡ. Тыуған еребеҙ урмандар биләмәһендә генә түгел, ҡалаларҙа һәм ауылдарҙа ла йәшел кейем кейенәсәк.

Урман ултыртыуҙы Бәләбәй муниципаль районы хакимиәте һәм “Бәләбәй урман хужалығы” учреждениеһы ойошторҙолар. Ирекмәндәр менән улар уҡыған уҡыу йорттары уҡытыусылары ла килде. МР хакимиәте башлығы урынбаҫары Наил Ғүмәров, репелленттар һиптереп, эшләүселәрҙең хәүефһеҙлеген тәьмин итте. Һыу килтереү ҙә ойошторолған. Үҙәк мәҙәниәт һарайы музыка уйнатыуҙы хәстәрләгән.

“Бәләбәй хәбәрҙәре” хәбәрселәре лә акциянан ситтә ҡалманы – бер нисә ҡарағай үҫентеһе ултыртты. Шаулап үҫ, йәшел урман!

– Ир-егет ағас ултыртырға тейеш, мин ҡырҡлапты ултырттым инде! – тип шаяртты бер студент.

Бәләбәй урмандары беҙҙең балаларыбыҙҙы һәм ейәндәребеҙҙе ҡыуандырһын!

Анна Лапина.

Елена Торгашова фотолары