135 модулле ФАП һәм амбулатория сафҡа индерелде

Башҡортостан «Һаулыҡ һаҡлау» милли проекты лидеры. 2024 йылда төбәктә 135 модулле фельдшер-акушерлыҡ пункты һәм амбулатория сафҡа индерелгән, 206 берәмек автотранспорт һәм 8 меңдән ашыу медицина аппараты һатып алынған. Был һаулыҡ һаҡлауҙың беренсел звеноһын модернизациялау программаһын тормошҡа ашырыу осоронда рекордлы күрһәткестәр.

Медицина кадрҙары менән дә тәьмин итеү яҡшырҙы: уҙған йыл йомғаҡтары буйынса республиканың медицина учреждениеларында 55,38 мең хеҙмәткәр, шул иҫәптән 16 177 табип һәм 39 203 шәфҡәт туташы һәм фельдшер эшләй. Медицина хеҙмәткәрҙәрен йәлеп итеүҙә «Ауыл табибы», «Ауыл фельдшеры» программалары ярҙам итә.